«Այսօր մամուլում, ընթերցելով «Հրապարակ» թերթի գույքը կալանքի ենթարկելու և դատական գործընթացի մասին հրապարակումների արգելքի դատավճիռը, չենք կարող լռել և չարտահայտել մեր խորը զայրույթը լրագրողների իրավունքի այս աննախադեպ և կոպտագույն խախտման վերաբերյալ: Եվս մեկ անգամ խախտվեց ոչ միայն լրագրողի իրավունքը, այլ նաև մեր սրբություն սրբոցը` ՀՀ մայր օրենք Սահմանադրությունը:
«Խոսքի իրավունք» միավորումը ծանոթացավ նաև համեստ բնորոշումով ՀՀ քաղաքացի Մեսրոպ Հարությունյանի բաց նամակին՝ ուղղված արդարադատության նախարար Հրայր Թովմասյանին: «Խոսքի իրավունք»-ը միանում է պրն. Հարությունյանի այս պնդմանը որ, իբր հայցի ապահովման միջոց գույքի վրա կալանք դնելը դեռ ինչ-որ տեղ կարելի է հասկանալ, սակայն հրապարակումներով հանդես գալու արգելանքը խոսքի ազատության աղաղակող ոտնահարում է:
Դատավորն այդ որոշմամբ խախտել է ՀՀ Սահմանադրությունը: Խոսքի ազատությունը ամրագրված է Սահմանադրության 27-րդ հոդվածում, համաձայն որի՝ «Յուրաքանչյուր ոք ունի խոսքի ազատության իրավունք, ներառյալ՝ տեղեկություններ և գաղափարներ փնտրելու, ստանալու, տարածելու ազատությունը՝ տեղեկատվության ցանկացած միջոցով՝ անկախ պետական սահմաններից։ Լրատվամիջոցների և տեղեկատվական այլ միջոցների ազատությունը երաշխավորվում է»։ ( Մ.Հ )
Մեր կազմակերպության աշխատանքներին բազմաթիվ իրավաբաններ և լրագրողներ են մասնակցում, որոնք լիահույս են, որ պրն. Հրայր Թովմասյանի գնահատականը համարժեք կլինի»:
«Խոսքի իրավունք» ՀԿ
