Ինչպես հաղորդում են ամերիկյան լրատվամիջոցները, հայտնի երգչուհի Լեդի Գագան հերթական արտասովոր քայլին է դիմել` նկարահանվելով Harper’s Bazaar ամսագրի համար: Այդ նկարներում նա հայտնվել է առանց մեյքափի` շպարի: Նկարներին ուղեկցող հարցազրույցում երգչուհին ասել է, որ իրեն բոլորովին չի մտահոգում՝ արդյոք ինքը շպարվա՞ծ է, թե՞ ոչ: Կարևորը, ըստ երգչուհու, որ հոգով լավ մարդ լինի:
«Կարծում եմ` հանդիսատեսի հետ հարաբերություններում կարևորն այն է, որ նա միշտ ինձնից ինչ-որ անսպասելի բան է ակնկալում»: Լեդի Գագան նշել է, որ հագուստի տեսակետից էլ նախընտրում է ընդհանրապես բան չկրել, քան հագնել արտառոց զգեստներ: «Ես հոգով ազատ եմ: Եվ միշտ այդպիսին եմ եղել: Նույնիսկ երբ փոքր էի, ես մերկ վազում էի դայակիս շուրջը` խելագարեցնելով նրան»,- ասել է Լեդի Գագան:
Նշվում է, որ ամսագրի հեղինակները, այդուհանդերձ, մի փոքր ստում են, թե հայտնի երգչուհին նկարահանվել է չշպարված: Նկատվում է թեթև շպար, ինչպես նաև ֆոտոշոփն է եկել օգնության: Ֆորումներում և սոցիալական ցանցերում մեկնաբանությունները շատ հակասական են: Ոմանք նշում են, որ այս վիճակով Լեդի Գագան նույնիսկ վախեցրել է իրենց:
