Ակնկալում ենք, որ Եվրամիությունը Հայաստանին խոստացված 2,6 միլիարդ եվրոյի աջակցությունը կտրամադրի հնարավորինս շուտ, հայտարարել է Հայաստանի վարչապետ Նիկոլ Փաշինյանը չեխական պարբերականներից մեկին տված հարցազրույցում: 2,6 միլիարդ եվրոյի աջակցության մասին 2021-ի ամռանը հայտարարեց Հայաստան ժամանած ԵԽ նախագահ Շարլ Միշելը: Ընդ որում, թերևս ուշադրության է արժանի այն, որ դա մինչև՝ այսպես ասած բրյուսելյան ձևաչափի գործուն մեկնարկն էր: Խոսքը վերաբերում էր Արևելյան գործընկերության երկրներին ֆինանսական օժանդակություն հատկացնելուն: Ընդ որում, Հայաստանին ու Վրաստանին բավականին մեծ խոստում էր՝ Վրաստանին ավելի մեծ, իսկ Ադրբեջանին՝ ընդամենը 100 միլիոն եվրո:
Բաքուն նույնիսկ դժգոհություն արտահայտեց այդ կապակցությամբ: Հետո իհարկե Եվրամիությունը Բաքվի հետ սկսեց քննարկել էներգետիկ գործակցության հեռանկարներ և երկու միլիարդ եվրոյի ներդրումային ծրագիր՝ էներգետիկ հզորությունները ավելացնելու համար: Իսկ Հայաստանը փաստացի դեռ սպասում է խոստացվաց 2,6 միլիարդից, որից մոտ 1,6 միլիարդը ենթադրվում է իբրև հնգամյա ժամմանակահատվածի դրամաշնորհ, իսկ 1 միլիարդը՝ բանկային նպաստավոր պայմաններով վարկավորում:
Ի դեպ, հնգամյա դրամաշնորհային ծրագիրը պարունակում է շատ կարևոր ուղղություններ, այդ թվում Հյուսիս-հարավ ավտոմայրուղու Սյունիքի հատվածի ֆինանսավորում, նաև մի քանի հարյուր միլիոն դոլարի ծրագրեր Սյունիքում բիզնես նախաձեռնությունների ֆինանսավորման համար: Սակայն, փաստորեն ստացվում է, որ խոստացված աջակցությունը դեռ չկա, ինչի մասին փաստորեն Հայաստանի վարչապետը հիշեցնում է չեխական մամուլի հետ զրույցում: Հարց է առաջանում՝ ինչու՞ չկա, և արդյո՞ք Եվրամիությունը 2,6 միլիարդ եվրոյի փոխարեն Հայաստան ուղարկեց Եվրամիության դիտորդներին, իսկ միլիարդները ներկայումս անհրաժեշտ են ուկրաինական պատերազմում Կիևին զանազան աջակցություն ցուցաբերելու համար: Առավել ևս, որ այդ պատերազմը մեկ տարվա ընթացքում հարյուրավոր միլիարդ դոլարի կորուստներ է պատճառել եվրոպական տնտեսությանը՝ էներգակիրների գերթանկացման, նաև ռուսական շուկայի հետ կապերը կտրելու հետևանքով: Թե՞ 2,6 միլիարդ եվրոյի աջակցության արագությունը կախված է նրանից, թե Հայաստանը որքան արագ համաձայնության կգա Ադրբեջանի հետ՝ այսպես կոչված խաղաղության պայմանագրի շրջանակում: Հայաստանի վարչապետ Նիկոլ Փաշինյանը չեխական պարբերականին հայտնել է, որ ԵՄ դիտորդների մասին որոշումը Հայաստանի հանրության շրջանում բարձրացրել է Եվրոպայի հանդեպ համակրանքը: Ըստ երևույթին պետք է շարունակել սակայն, որ այդ համակրանքը մեղմ ասած կարող է տուժել, եթե Եվրամիությունը Արևելյան գործընկերության ծրագրով նախատեսվող ֆինանսական օժանդակությունը պայմանավորվի «բրյուսելյան ձևաչափի» ժամանակացույցով և բովանդակությամբ:
