«Մշակույթի բնագավառում հայ-ռուսական կրթական» համաժողովի շրջանակում, որը մեկնարկեց ապրիլի 28-ին Արամ Խաչատրյանի տուն-թանգարանում, մասնակիցները քննարկեցին մշակույթի ոլորտում երկու երկրների համագործակցության ընդլայնման, կրթական միջավայրի բարելավման, կադրերի վերապատրաստման, բուհերի աշխատանքում տեխնոլոգիաների ու նորարարությունների ներդրմանն առնչվող հարցեր:
ՀՀ կրթության, գիտության, մշակույթի և սպորտի նախարարի տեղակալ Արա Խզմալյանը հավաստիացրեց, որ հայ-ռուսական մշակութային կապերը նկատելիորեն ակտիվացել են: «Պարբերաբար Հայաստան են ժամանում հայտնի դաշնակահարներ, դիրիժորներ, ջութակահարներ, վոկալիստներ և տեղի ստեղծագործական խմբերի հետ համատեղ համերգներով են հանդես գալիս: Մեր դիրիժորներն էլ շատ ակտիվ գործունեություն են ծավալում ռուսական ամենաբարձր ու առաջատար հարթակներում, իսկ այսօրվա քննարկման առանցքում գեղարվեստական կրթության խնդիրն է: Կարծում եմ՝ այստեղ շատ մեծ համագործակցության հեռանկարներ կան, քանի որ պատմականորեն մեր կրթական համակարգի բազմաթիվ ճյուղեր ձևավորվել են ժամանակի ամենաարդյունավետ ռուսական մեթոդներով, սկզբունքներով: Կհիշե՞ք՝ ինչպես էին մեր կոնսերվատորիայի ղեկավարները խոսում իրենց ռուս ուսուցիչների մասին, ինչ բարձր էին գնահատում այն կրթությունը, որն ստացել են: Այսինքն, կան ձևավորված սկզբունքներ հատկապես կատարողական արվեստում»,-ընդգծեց փոխնախարարը:
Խզմալյանի համոզմամբ՝ եթե խոսում ենք բարձրակարգ մշակութային արդյունքի, առաջադեմ գեղարվեստական գործընթացների և առհասարակ պրոֆեսիոնալ գործունեության մասին, չենք կարող անտեսել կրթության առանցքային նշանակությունը:
Այժմ քայլեր են ձեռնարկում Երևանի պարարվեստի պետական քոլեջի կապերը ռուսական բալետային դպրոցների հետ ամրապնդելու ուղղությամբ: «Ե՛վ թատերական, և՛ պարարվեստի ասպարեզում կան փայլուն ռուս մասնագետներ, որոնց ներուժը, փորձառությունն ու գիտելիքներն օգտագործելը բխում է մեր շահերից: Մշակույթը, կրթությունն այն ոլորտներն են, որոնք պետք է անկախ լինեն որևէ վայրիվերումից, ցնցումներից, և հենց դա է պահպանում ժողովուրդների փոխադարձ հարգանքը»,-շեշտեց Խզմալյանն ու հույս հայտնեց, որ համաժողովի ընթացքում ծավալվող քննարկումները ևս արդյունք կտան:
Համաժողովի շրջանակում երկկողմանի համագործակցության հուշագրեր ստորագրվեցին Հայաստանի և Ռուսաստանի մի քանի գիտական, կրթական ու երաժշտական հաստատությունների միջև:
ՌԴ մշակույթի նախարարի տեղակալ Վլադիմիր Օսինցևն էլ վստահեցրեց, որ կրթության բնագավառը հայ-ռուսական փոխգործակցության նշանակալի ուղղություններից է և ընթերցեց ՌԴ մշակույթի նախարար Բորիս Լյուբիմովի ուղերձը:
Ուղերձում ասվում էր, որ ստեղծագործական կրթության բնագավառում համագործակցության զարգացումը երկու պետությունների մշակութային փոխգործակցության կարևորագույն ուղղություններից է: «Ռուսաստանն ու Հայաստանն աշխարհին են նվիրել մշակույթի ականավոր գործիչների, որոնց թողած հարուստ ժառանգությունը փոխանցվում է սերնդեսերունդ առաջին հերթին մեր յուրահատուկ մանկավարժների ու վարպետների ջանքերի շնորհիվ: Հենց այդ պատճառով մշակույթի ոլորտում կրթությունը մեծ դերակատարություն ունի երկու երկրների պետական քաղաքականության մեջ: Մեր մշակույթների հարստությունը, համընդհանուր պատմությունը, հարգանքը ժառանգության հանդեպ, մշակութային ավանդույթների սիմբիոզը երկու կողմերի հումանիտար համագործակցության հիմնասյուներից են»,-նշվում էր ուղերձում:
Լյուբիմովը համոզմունք էր հայտնել, որ համաժողովի անցկացման շնորհիվ նոր պայմանավորվածություններ ձեռք կբերվեն երկու երկրների տարբեր հաստատությունների միջև, կյանքի կկոչվեն վառ ու համարձակ նախագծեր:
Լիագումար նիստի մեկնարկից առաջ մասնակիցները, որոնց թվում էին Վոլոգդայի և Կոստրոմայի մարզերի մշակույթի դեպարտամենտների տնօրեններ Վլադիմիր Օսիպովսկին և Մարինա Նազինան, մշակութային և կրթական հաստատությունների, մշակութային բուհերի ղեկավարներ, հնարավորություն ունեցան ծանոթանալու «Երգում եմ քեզ, իմ Հայաստան» ցուցահանդեսին, որում ընդգրկված են «Արմենֆիլմ» կինոստուդիայի ստեղծած ֆիլմերի պաստառներ։
Համաժողովին կհաջորդի Հայաստանում ռուսական կինոյի օրերի բացման հանդիսավոր արարողությունը, որը տեղի կունենա «Մոսկվա» կինոթատրոնում ռուսական վարձույթի ռեկորդակիր դարձած «Չեբուրաշկա» ֆիլմի ցուցադրությամբ։