«Առաջին լրատվական»-ի զրուցակիցն է Արցախի խորհրդարանի արտաքին հարաբերությունների մշտական հանձնաժողովի նախկին նախագահ, քաղաքագետ Վահրամ Աթանեսյանը։
–Վարչապետ Փաշինյանը կառավարության նիստում հայտարարել է, որ ԼՂ-ում և Լաչինի միջանցքում անհրաժեշտ է ավելի լայն միջազգային ներկայություն։ Ձեր կարծիքով՝ ի՞նչ միջազգային ներկայություն կարող է լինել Ռուսաստանի պատասխանատավության գոտում, որքանո՞վ է դա առհասարակ իրատեսական։
–Երբ հանրության, քաղաքական ուժերի ուշադրությունը սևեռված էր Տեղ գյուղի հատվածում հայ-ադրբեջանական փաստացի սահմանազատման և մի քանի տասնյակ կամ հարյուր հեկտար հողահանդակների և արոտավայրերի վրա, ինձ թույլ տվեցի հարցնել՝ իսկ Կոռնիձորի հատվածում Լաչինի միջանցքի ռեժիմը և պարամետրերը պահպանվելու՞ են, որևէ մեկը տեղյա՞կ է։ Արձագանք չեղավ, որովհետև մենք, ցավոք, գլխավորը թողնում ենք մի կողմ։ Հիմա ի՞նչ միջազգային ներկայություն և ինչպե՞ս է ստիպելու, որ Հակարիի կամրջին «Դուք մուտք եք գործում Ադրբեջանի հանրապետություն» ցուցանակը հանվի։ Եթե խաղաղապահ ուժերն այնտեղ չեն տեղադրել․ «Լաչինի միջանցք․ ՌԴ խաղաղապահ զորախմբի պատասխանատվության գոտի» ցուցանակ, ինչպես կար Տեղ գյուղի հատվածում, ուրեմն առկա են բարձր մակարդակի պայմանավորվածություններ։ Որքանո՞վ է Հայաստանը տեղեկացված կամ՝ Ստեփանակերտը, սա արդեն ներքին սպառման հարցադրում է։
-Փաշինյանը նաև շեշտեց՝ Լեռնային Ղարաբաղի հայության իրավունքներն ու անվտանգությունը պետք է դառնան Ստեփանակերտի և Բաքվի միջև բանակցությունների առարկա՝ միջազգային ֆորմատի շրջանակներում։ Ո՞ր միջազգային ֆորմատը կարող է նման երկխոսության երաշխավոր լինել՝ հատկապես Ռուսաստան-արևմուտք առճակատման ֆոնին։
–Սուբյեկտիվ գնահատական եմ տալու․ մինչև Ստեփանակերտը չհրապարակայնացնի իր բանակցային թղթապանակը, միջազգային որևէ խաղացող Բաքվի հետ քննարկումների մեջ չի մտնելու։ Գլխավոր խնդիրը ղարաբաղա-ադրբեջանական շփման գծի լիարժեք ապառազմականացման և ենթակառուցվածքների վերականգնման հասնելն է։ Միայն դրանից հետո է հնարավոր անցնել քաղաքական հարցերի քննարկման։
-Ի՞նչ կտա խաղաղապահ առաքելության հրամանատարի փոփոխությունը, սա կապ ունի՞ անցակետ տեղադրելու հետ, արդյոք ՌԴ-ի իմացության Ադրբեջանը կարող էր նման քայլի գնալ։
–Խաղաղապահ զորախմբի հրամանատարը գործում է ունեցած լիազորությունների շրջանակներում։ Անձի փոփոխությունը սկզբունքային նշանակություն, կարծում եմ, չունի։
-Երբ Ռուսաստանը պաշտոնական մակարդակով խոսում է հավելյալ ջանքերի անհրաժեշտության մասին, ըստ Ձեզ ի՞նչ նկատի ունի, ի՞նչն էր խանգարում Ռուսաստանին թույլ չտալ խախտել նոյեմբերի 9-ի հայտարարության դրույթները և պահել Լավրովի խոսքը, որ եռակողմ համաձայնագրով անցակետի տեղադրում նախատեսված չէ։
–-Այդ հարցին ոչ ոք նույնիսկ մոտավոր ճշտության պատասխան չունի։
