Օրեր արաջ վերսկսվեց ոստիկանների և Հայ ազգային կոնգրեսի 7 երիտասարդ ակտիվիստների միջև օգոստոսի 9-ին տեղի ունեցած քաշքշուկի առնչությամբ հարուցված քրեական գործի նախաքննությունը: Ինչպես «Առաջին լրատվական»-ի հետ զրույցում տեղեկացրեց ՀԱԿ ակտիվիստների փաստաբան Վարդուհի Էլբակյանը, միջնորդություն էր ներկայացվել առերեսումներ, հարցաքննություններ անցկացնելու վերաբերյալ:
«Միջնորդություն էր ներկայացվել գործը վարող նախաքննական մարմնին՝ Արտակ Կարապետյանի հարցաքննության վերաբերյալ, որը բավարարվեց, և այսօր նա ցուցմունք կտա քննչական գլխավոր վարչությունում»,- տեղեկացրեց փաստաբանը` հավելելով, որ մինչ այս բոլոր միջնորդությունները մերժվել են: «Սա դրական միտում է, քանի որ առաջին միջնորդությունն է, որը բավարարվեց»,- նշեց Վ. Էլբակյանը` հույս հայտնելով, որ որևէ բան կփոխվի:
Խոսելով հետագա քայլերից` փաստաբանը մեկնաբանեց, որ Արտակի ցուցմունքից հետո կորոշվեն հետագա քայլերն ու անելիքները: «Նրա այսօրվա ցուցմունքը շատ որոշիչ և կարևոր է, քանի որ ըստ դրա կորոշվի՝ կլինե՞ն հետագա առերեսումներ, հարցաքննություններ, թե՞ ոչ»,-ասաց փաստաբանը:
Հիշեցնենք, որ Օգոստոսի 9-ի միջադեպից հետո ՀԱԿ 7 ակտիվիստները ձերբակալվել էին, որոնցից 6 ազատ էին արձակվել: ՀԱԿ ակտիվիստ Տիգրան Առաքելյանը մինչ այժմ անազատության մեջ է և մեղադրվում է խուլիգանության մեջ` Քրեական օրենսգրքի 258 հոդվածի 3-րդ մասի հատկանիշներով: Այս հոդվածի պատժամիջոցը մինչև հինգ տարվա ազատազրկումն է կամ տուգանքը` նվազագույն աշխատավարձի 200-ապատիկից 500-ապատիկի չափով։
