Յանցագործ աշխարհի առաջատար դէմքերէն Ալաատտին Չաքըճըի փաստաբան Սինան Ինճէ յայտնած է թէ 2016 թուին Կարօ Փայլանի դէմ մահափորձ կազմակերպած են, բայց վերջին պահուն գործադրելէ հրաժարած։
Այս մասին Փայլան պատմեց թէ թուական եւ վայր նշելով, եւ նոյնիսկ մասնակից յանցագործերու անունները թուելով կատարուած սպառնալիքէ մը ետք դատախազութիւնը պէտք էր ինքնաբերաբար հարցաքննութիւն կատարէր։ «Ամիսներ շարունակ աշխատեցայ որ դատախազութիւնը շարժման անցնի։ Ի վերջոյ «յստակ փաստեր չկան» ըսելով որեւէ հարցաքննութիւն չկատարեցին։ Այս մահափորձի պատուիրատու ըլլալով նշուած Լեւենթ Կէօքթաշ ներկայիս Նեճիպ Հապլեմիթօղլուի սպանութեան մեղադրեալն ըլլալով բանտն է։ Առանց Սինան Ինճէի, այսինքն այս նիւթով յայտարարութիւն ընող փաստաբանին հարցաքննութեան խնդիրը քօղարկել կ՚աշխատին։ Սա դիտումնաւոր յանցագործութիւն մըն է, որուն նմանները անցեալին յաճախ տեսած ենք։ Անգարայի մութ նրբանցքներուն մէջ այս տեսակ ծրագիրները քօղարկել կը ջանան» ըսաւ Կարօ Փայլան։
9 Ապրիլ կիրակի, յայտարարուեցաւ Կանանչ Ձախ Կուսակցութեան պատգամաւորներու անուանացանկը։ Կարօ Փայլան կուսակցութեան երկու շրջանով սահմանափակելու սկզբունքին հետեւանքով թեկնածու չէ կրցած ներկայանալ։ «Այս կանոնը անշուշտ որ գիտեմ։ Պէտք էր հայ թեկնածու մը առաջադրուէր։ Գիտեմ որ այս մասին որոշ աշխատութիւն ալ տարուեցաւ, բայց որեւէ անունի շուրջ համաձայնութիւն չգոյացաւ։ Այս պայմաններու մէջ կանոնի զանցառութիւն մը կարելի էր, բայց այդ ճամբան չէ նախընտրուած։ Մեր նման հաւաքականութիւնները քաղաքական գետնի վրայ ընդմիշտ պատրաստ ուժեր կրնան չունենալ։ Անշուշտ որ ուրիշ մը ինծի կրնար փոխարինել։ Եթէ 2015-ի պայմանները ի զօրու ըլլային վստահ եմ որ զանազան հայեր կուսակցութեան շարքերուն մէջ պաշտօն ստանձնելու պատրաստակամութիւն կ՚ունենային։ Օրինակ անցեալ տարուայ համագումարին ալ կուսակցութեան վերին խաւերուն մէջ պաշտօն ստանձնելու տրամադիր թեկնածուներ չգտանք։ Մեր կուսակցութիւնը բոլոր ժողովուրդներու ներկայացուցչութիւնը որդեգրած ըլլալուն հայ գործիչներու բացակայութիւնը զիս կը յուզէ։ Ես երկու շրջան պատիւով եւ հպարտութեամբ կատարեցի երեսփոխանութեան պատասխանատուութիւնս։ Այս մասին աշխատելէ չեմ դադրած։ Իմ ազգս թող գիտնայ որ թէ անցեալի հետ առերեսուելու առումով եւ թէ արդար ապագայի մը կառուցման համար պիտի շարունակեմ շարքային զինուորի մը նման իմ պարտականութիւնս կատարել»։
Կարօ Փայլան նշեց նաեւ Անգարայի 2-րդ ընտրաշրջանէն թեկնածու առաջադրուելու մասին պնդումները ըսելով թէ, ըստ երեւոյթի ցանկերու նախագիծը ձեւով մը փոխանցուած է մամուլին։ Ժողովներու ընթացքին որոշում կայացուցած էինք ընտրուելու հաւանականութեան տկար եղած շրջաններու մէջ ազդեցիկ անուններ տեղադրելու մասին։ Իսկ ես մերժեցի այս առաջարկը։
Կարօ Փայլան վերջապէս նշեց թէ նոյնիսկ խորհրդարանի անդամ չըլլայ պիտի շարունակէ Հայաստան-Թուրքիա յարաբերութիւններու հաստատման համար աշխատելու։
