Իրանի դեմ պետք է պայքարել համատեղ, Իսրայելում ընդունելով Ադրբեջանի արտգործնախարար Բայրամովին ասել է Իսրայելի արտաքին գործերի նախարար Կոենը: Ըստ նրա, միջուկային իրանը սպառնալիք է և պետք է համատեղ պայքարել այդ սպառնալիքի դեմ: Ադրբեջանի արտգործնախարարի իսրայելական այցը տեղի է ունենում Իրանի արտգործնախարար Աբդոլահիանի Ռուսաստան կատարած այցին զուգահեռ, որտեղ Լավրովը իրանցի գործընկերոջ հանդիպման բացման խոսքում նկատել է, որ իրանական օրացույցով Տարեմուտից՝ Նովրուզից հետո Աբդոլահիանն առաջին այցը կատարում է Ռուսաստան: Լավրովի այդ դիտարկման ֆոնին թերևս արժե նկատել և այն, որ մինչ Իրանի արտգործնախարարի Մոսկվա այցը, Նովրուզից անմիջապես հետո առաջին արտերկրյա այցը Իրանի փոխարտգործնախարարն էր կատարել Հայաստան, ընդ որում թվիթերյան գրառումով էլ նշելով այդ հանգամանքը:
Իհարկե, որքան այդ հանգամանքը ջերմ է երկկողմ հարաբերության համատեքստում, նույնքան առաջացնում է խորհելու մի շարք լուրջ առիթներ՝ արդեն ռեգիոնալ իրողությունների համատեքստում: Այն, որ Իսրայելի արտաքին գործերի նաարարը բաց տեքստով խոսում է Իրանի դեմ Ադրբեջանի հետ համատեղ պայքարի անհրաժեշտության մասին, հուշում է, որ Թել Ավիվը գործնականում անցել է Բաքվից ուղիղ ակնկալիքների եւ կարելի է պատկերացնել, թե ինչպիսի խոսակցություն է ծավալվում ոչ հրապարակային տիրույթում, եթե հրապարակային մակարդակում բաց տեքստով հայտարարվում է Իրանի դեմ համատեղ պայքարի անհրաժեշտության մասին: Միեւնույն ժամանակ, դա նշանակում է թերևս, որ Ադրբեջանը դիմադրում է, այլապես հազիվ թե լինեին այդպիսի բաց հայտարարություններ:
Բաքուն դիմադրում է Իրանի դեմ դուրս գալուն և Իսրայելը թերևս այդ իսկ պատճառով անցնում է հայտարարությունների առավել բաց տեքստի, ինչը նշանակում է նաև, որ Բաքվի հանդեպ կարող է գործի դրվել նաեւ ճնշման որոշակի մեխանիզմ, եւ դա իհարկե «հակաիրանյան» ավելի լայն կոալիցիայի համատեքստում: Ալիևը անշուշտ պատկերացնում է ռիսկերը, որով հղի է Իրանի դեմ անգամ գործնականում անուղղակի դուրս գալը, ուր մնաց բացահայտ առճակատումը: Մյուս կողմից սակայն, Ադրբեջանն ինքը ենթակա է ճնշումների և դրանց միջոցներից մեկն անշուշտ Հայաստանի հետ հակամարտությունն է, ինչը էլ ավելի է բարդացնում ու խճճում պատկերը, այդ կերպ նաեւ բարձրացնելով իրավիճակի անկանխատեսելիության աստիճանը:
