«Կասկածում եմ, որ քննությունը կբացահայտի իրողությունը»,- այսօր «Առաջին լրատվական»-ի հետ զրույցում ասաց «Եղնիկներ» զորամասում դաժանորեն սպանված զինծառայող Աղասի Աբրահամյանի հայրը` կասկած հայտնելով հարուցված քրեական գործի քննության անաչառության վերաբերյալ: «Կասկածում եմ, որ գործի մանրամասները կբացահայտվեն: Հիմա երկուսն են ձերբակալված, դա է կասկածելու տեղիք է տալիս: Տղայիս ֆիզիկական տվյալներն այնպիսին էին, որ երկու հոգին չէին կարող այդ ուժգնությամբ ծեծի ենթարկել»,- ասաց Գեղամ Աբրահամյանը: Նրա կարծիքով՝ զինծառայողների մեջ եղել է վիճաբանություն, սակայն նրանք չեն պատկերացրել, որ մարմնական վնասվածքներն այդքան լուրջ կարող են լինել: «Հետագա ամենալուրջ բարդությունը եղել է բուժկետում։ Իմ կարծիքով՝ մահվան պատճառը բուժկետում է թաքնված: Ես համոզված եմ, որ մահն այդտեղ է վրա հասել, բուժկետի հրամանատարը ծեծի է ենթարկել արդեն երկրորդ անգամ, բայց, իմ կարծիքով, ոչ մենակ: Սպան ասել է, թե իբր տղան «սաչկավատ» էր լինում: Հետաքրքիր ա, ի՞նչ էր արել, որ մահու աստիճան ծեծել էր. երկու անգամ ապտակել է, որից հետո Աղասը հայտնել է գետնին և աքացիներով է սկսել ծեծել»,- նկարագրեց Աղասիի հայրը` շարունակելով, որ երկու դեպքում էլ կասկածում է, որ մի հոգի է ծեծի ենթարկել:
«Դա անհնար ա. Աղասին սպորտով էր զբաղվել և շատ ամրակազմ երիտասարդ էր մեկի ծեծի արդյունքում այդպիսի վնասվածքներ ստանալու համար: Ես համոզված եմ, որ մեկ հոգի չէ, շատ մարդ կա այս գործի մեջ»,- նշեց Գ. Աբրահամյանը:
Քրեական գործի մասին հայրը որևէ տեղեկություն չունի, քանի որ նրանից գործի ընթացքի մանրամասները գաղտնի են պահվում: «Ինձ ոչ ոք չի տեղեկացնում, ինչ գիտեմ՝ լրատվամիջոցներից գիտեմ, նույնիսկ զորամասում այնպիսի հսկողություն է հիմա սահմանված, որ ոչ մի կերպ չենք կարողանում զանգահարել «Եղնիկներ»: Նա այնպիսի տղա էր, որ հաստատ շատ ընկերներ ունեցած կլիներ բանակում, բայց ոչ մեկի հետ չենք կարողանում կապվել և խոսել: Ես հիմա հաստատ համոզված եմ, եթե գնամ Ղարաբաղ՝ «Եղնիկներ», ինձ մուտքից ներս թույլ չեն տալու»,- համոզված ասաց Աղասու հայրը: Նա նաև տեղեկություններ ունի , որ «Եղնիկներում» կարանտին է հայտարարված:
«Հաղորդում են, որ գաղտնիությունը պահպանվում է: Ինչո՞ւ, որ հանցագործների ընտանիքի անվտանգությունը պաշտպանվի՞, բա իմ ընտանիքի անվտանգությունը ինչո՞ւ չպահեցին: Իմ մինուճար տղան գնաց կորավ: Մինուճար երեխա կորցնողը կարող ա միայն պատկերացնի, թե դա ինչ ա: Ոչ ոք չի զգա այդ ցավը: Ի՞նչ պիտի արած լիներ իմ տղան, որ ընենց ծեծեին գազանաբար, որ մահ բերեր: Դա՞ են սովորեցրել սպաներին, հրամանատարներին. այնպես ծեծել զինծառայողին, որ մահ բերի»,- ցավով նշեց Աղասու հայրը:
Հիշեցնենք, որ օգոստոսի 26-ին «Եղնիկներ» զորամասում դաժանաբար սպանվել էր ժամկետային զինծառայող Աղասի Աբրահամյանը, ինչի առթիվ քրեական գործ է հարուցվել, և զորամաս էր մեկնել պաշտպանության փոխնախարար Վլադիմիր Գասպարյանը:
Գործով մեղադրվող մեկ սպա և մեկ զինծառայող են ձերբակալվել:
