«Հայ իրականության մեջ դա բացառիկ երևույթ էր: Նորմալ է, որ մեր հասարակությունն այդպիսի արձագանք է տալիս այդ ամենին։ Իհարկե, լինում են մանր-մունր բաներ, սակայն այն, ինչ հիմա են տեսնում, մարդկանց համար երևի շոկ է, ու դրա համար են այդքան կոպիտ արձագանքում». մեկնաբանելով դերասանուհի Անժելա Սարգսյանի անվան շուրջ բարձրացած աղմուկն ու համացանցում հայտնված մերկ լուսանկարները` «Առաջին լրատվական»-ի հետ զրույցում ասաց «Ո՞ւր է իմ տղամարդը» հեռուստասերիալում Ա. Սարգսյանի գործընկեր, երգիչ-երգահան Ռիչարդ Մադլենյանը:
«Եթե մարդը հեռուստասերիալում մարմնավորում է գեղեցիկ հայ կնոջ, և հասարակությունը դա տեսնում է, հավատացեք, նրա համար դա հեշտ չէ մարսել այդ ամենը: Պետք է մի քիչ զգույշ լինել այդ հարցերում, քանի որ հասարակությունը կոպիտ գործիք է»,- ասաց նա` նշելով, որ իրեն իրավունք չի վերապահում քննադատել դերասանուհու անձնական կյանքը, սակայն նա պետք է նախապես մտածեր իր արածների հետևանքների մասին:
«Չի կարելի անընդհատ խոսել բարոյականությունից, քրիստոնեական արժեքներից, հավատից ու դրա հետևում անել բաներ, որոնք դրա հետ ոչ մի կապ չունեն: Մարդ պետք է ճիշտ ապրի, որովհետև սուտը միշտ ջրի երես է դուրս գալիս»,- ընդգծեց նա:
Ինչ վերաբերում է «Ո՞ւր է իմ տղամարդը» սերիալի հերոսուհիների` Անժելայի հետ սերիալում չնկարահանվելու ու չհամագործակցելու ցանկությանը, ապա դերասանը դա բնական համարեց: Նրա խոսքով` մյուս դերասանուհիների նման պահվածքը պայմանավորված է նրանով, որ դա անուղղակիորեն առնչվում է նաև նրանց: «Բոլոր դեպքերում, այսօր աղջիկների անունն էլ է շատ շոշափվում: Դա չպետք է լիներ, քանի որ այնտեղ կան մարդիկ, որոնք շատ ճիշտ են ապրել իրենց կյանքը ու բարոյական են»,- նկատեց Ռ. Մադլենյանը:
Հարցին՝ արդյո՞ք դերասանը պատրաստ է խաղալ իր նախկին գործընկերուհու հետ, Ռ. Մադլենյանը պատասխանեց, որ միանշանակորեն չի կարող պատասխանել, բայց այս պահի դրությամբ ինքն էլ չէր խաղա:
«Ես նրա մարդկային տեսակի հետ կապված այլ խնդիրներ ունեի: Չէի ցանկանա նրա հետ խաղալ ընդհանրապես: Չեմ ասում, թե մարդիկ նման բաներ չեն անում, պարզապես նրանք մի քիչ խելքով են անում: Ուղղակի զարմացած եմ նրա համարձակության վրա»,- ասաց դերասանը՝ ավելացնելով, որ նրա փոխարեն ինքը մի որոշ ժամանակով կհեռանար Հայաստանից, մինչև կրքերը հանդարտվեն:
