Ադրբեջանական APA լրատվական գործակալության փոխանցմամբ՝ Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը հայտարարել է, որ Դուշանբեում տեղի ունեցած ԱՊՀ երկրների ղեկավարների գագաթնաժողովում վարչապետի մակարդակով Ադրբեջանի մասնակցությունը չի վկայում ԱՊՀ-ի հանդեպ Ադրբեջանի մոտեցման մասին։
Նա ընդգծել է, որ ԱՊՀ գագաթնաժողովներում ոչ միայն Ադրբեջանը, այլև մյուս երկրները նույնպես երբեմն ներկայացված են լինում վարչապետի, խորհրդարանի խոսնակի և անգամ նախարարի մակարդակով։
Հիշեցնենք, որ Դուշանբեի գագաթնաժողովում Ադրբեջանը ներկայացրել է վարչապետ Արթուր Ռասիզադեն, որը Լեռնային Ղարաբաղի համար վիճաբանության մեջ է մտել Սերժ Սարգսյանի հետ։
Նախապես նշվում էր, որ Դուշանբեի գագաթնաժողովում Ադրբեջանը պետք է ներկայացներ նախագահ Ալիևը, սակայն Սոչիում Ռուսաստանի նախագահ Դմիտրի Մեդվեդևի հետ ունեցած «ղարաբաղյան» բանակցությունները չտվեցին նրա ակնկալած արդյունքները, որից հետո Ալիևը, որպես բողոքի նշան, բոյկոտեց Դուշանբեի գագաթնաժողովը։