Eurasianet-ի փոխանցմամբ՝ Ադրբեջանում ԱՄՆ դեսպանատանից Վաշինգտոն ուղարկված գաղտնի փաստաթղթերում, որոնք հայտնվել են WikiLeaks կայքում, Ադրբեջանի նախագահ Իլհամ Ալիևը նմանեցվում է «Կնքահայր» ֆիլմի երկու մաֆիոզ բոսսերին՝ իմպուլսային Սաննի Կոռլեոնեին և նրա եղբորը՝ սառնասիրտ ու հաշվենկատ Մայքլին։
Ամերիկյան փաստաթղթերում նշված է, որ Իլհամ Ալիևի բնավորության այս երկվությունը հաճախ հանգեցնում է նրան, որ «ամերիկյան շահերը» հակասության մեջ են մտնում «ամերիկյան արժեքների» հետ։
2009 թվականի սեպտեմբերին Բաքվում ամերիկյան առաքելության ղեկավարի տեղակալ Դոնալդ Լուն գաղտնի հաղորդագրություն է ուղարկել Վաշինգտոն, որում նշում է. «Ալիևի վարած արտաքին քաղաքականությունն ի ցույց է դնում նրա այն կողմը, որը բնորոշ է «Մայքլ Կոռլեոնե»-ին՝ պրագմատիզմով, զսպվածությամբ և Արևմուտքին ինտեգրվելու հակվածության օգտակարությամբ։
Մինչդեռ նրա ներքին քաղաքականությունը, հատկապես այն, որ 2009 թվականին բանտում հայտնվեցին բլոգերներ Էմին Միլլին ու Ադնան Հաջիզադեն, ի ցույց է դնում «Սաննի Կոռլեոնե»-ի ներքին էությունը, որին բնորոշ են հեղինակության մեծացումը և քաղաքական հայացքների լայն շրջանակ ունեցողների հանդեպ տածած թշնամությունը։
«Մայքլ-Սաննի» այս երկվությունը բարդացնում է Բաքվի հանդեպ մեր մոտեցումը և անբարենպաստ ազդեցություն ունենում՝ խանգարելով ամերիկյան շահերի և ամերիկյան արժեքների կարևոր փոխազդեցությանը։
Արտաքին քաղաքական հարցերի վերաբերյալ Ալիևի առողջ մոտեցման և ներքաղաքական հարցերի հանդեպ տխրահռչակ մոտեցման այս տարբերությունն ակնհայտորեն հարց է առաջացնում, թե ինչպե՞ս են այդ երկու իրողությունները գոյակցում միմյանց հետ»։
