Շոգ եղանակային պայմանների պատճառով հրդեհները շարունակում են ահաբեկել Տեխասի բնակչությանը: Իրավիճակն այնքան է սրվել, որ Տեխասի նահանգապետ Ռիք Փերին, որը հայտարարել է 2012 թ. ԱՄՆ նախագահական ընտրությունների մասնակցելու մասին և այս օրերին նախընտրական հանդիպումներ է անցկացնում, ստիպված է եղել դադարեցնել արշավը և վերադառնալ Տեխաս: Այս մասին հաղորդում է Associated Press գործակալությունը:
Նահանգի կենտրոնական շրջաններում արագ տարածվող հրդեհներն արդեն ոչնչացրել են մոտ 500 տուն, ավելի քան 5 հազար մարդ ստիպված է եղել լքել բնակարանները: «Տեխասում հրդեհների հետ կապված իրավիճակը շարունակում է ծանր մնալ, մարդկանց և նրանց ունեցվածքի պաշտպանությանը հատկացվում են բոլոր անհրաժեշտ միջոցները»,- հայտարարել է նահանգապետը:
Հրդեհաշիջման աշխատանքներին մասնակցում են ցամաքային և օդային ուժեր: Այս պահին հայտնի է 63 օջախի մասին: Հրդեհն ավելի է ուժեղացել Լի անունը ստացած մերձարևադարձային փոթորկի պատճառով:
