Իսրայելական Cursorinfo.co.il կայքի փոխանցմամբ՝ թուրքական նավատորմը ներառվում է Արևելյան Միջերկրածովի գազի պայքարում։ Թուրքական ազդեցիկ Hürriyet թերթին տված հարցազրույցում Թուրքիայի ԱԳՆ-ի բարձրաստիճան պաշտոնյաներից մեկը հայտարարել է, որ այսուհետ Արևելյան Միջերկրածովը չի հանդիսանալու քաղաքացիական նավերին սպառնացող իսրայելական ռազմածովային ուժերի զորավարժության հրապարակ։
Թուրք դիվանագետի խոսքերով՝ այդ ամենը կյանքի է կոչվել Դավութօղլուի հետևյալ հայտարարությանը համապատասխան. «Թուրքիան ձեռնարկելու է իր համար անհրաժեշտ նախազգուշական միջոցները, որպեսզի ապահովի Արևելյան Միջերկրածովի նավարկությունը»։
Թուրք դիվանագետները նշում են, որ Թուրքիայի ռազմածովային ուժերն ուժեղացնելու են Միջերկրական ծովում իրենց ակտիվությունը և պարեկություն են իրականացնելու միջազգային ջրերում. «Մենք առավել ագրեսիվ ենք գործելու։ Իսրայելն այլևս չի կարող ազատորեն սպառնալ։
Թուրքիայի ռազմածովային ուժերը մտադիր են ուղեկցել Կիպրոսի ու Իսրայելի միջև ընկած տարածքում դեպի Գազայի հատված ուղևորվող և հումանիտար բեռ փոխադրող նավերին։ Այսուհետ, թուրքական ռազմանավերն ավելի կնկատվեն տարածաշրջանում»։
Թուրքերը մտադիր են ծովում սպառնալ ոչ միայն Իսրայելին. նրանց ռազմանավերը մտադիր են պարեկություն կատարել այն շրջանում, ուր Կիպրոսը (նրա հունական հատվածը) հայտնաբերել է գազ և մտադիր է արդյունահանել այն։ Թուրքիան վստահեցնում է, թե դա իր հատվածն է։
Հիշեցնենք, որ երբ նախորդ տարվա դեկտեմբերին Իսրայելն ու Կիպրոսը պայմանագիր կնքեցին սահմանային ջրերում նավթի ու գազի որոնման և արդյունահանման շուրջ, դա հարուցեց Թուրքիայի խոր դժգոհությունը: Պարզաբանումներ տալու նպատակով անմիջապես թուրքական արտգործնախարարություն կանչվեց Անկարայում Իսրայելի դեսպան Գաբի Լևին:
Թուրքիայի փոխարտգործնախարար Ֆերիդուն Սինիրլիօղլուն հայտարարեց, թե այդ պայմանագիրն իրենք դիտարկում են որպես Թուրքիայի տարածաշրջանային շահերին դիպչող դավադրություն, և իսրայելական կողմից պահանջեց չեղյալ հայտարարել այն: Սակայն իսրայելական կողմը չընկրկեց և մերժեց թուրքական պահանջը` դա որակելով պարզապես լկտիություն, քանի որ իրենք նախատեսել են նավթի ու գազի որոնողական աշխատանքներ տանել ոչ թե Հյուսիսային Կիպրոսի ու Թուրքիայի միջև ընկած ջրատարածությունում, այլ` (Հարավային) Կիպրոսի ու Իսրայելի միջև ընկած ջրատարածությունում:
Ի դեպ, Կիպրոսը մինչ այդ նմանատիպ պայմանագրեր էր կնքել Եգիպտոսի ու Լիբանանի հետ:
