ԱՄՆ տնտեսությունը, դեռ չհասցնելով ուշքի գալ վերջին ճգնաժամից, վերջին ամիսներին նորից հայտնվել է անկման եզրին: ԱՄՆ ՀՆԱ-ի աճի տեմպը տարեկան վերահաշվարկով 1%-ով դանդաղել է, բնակարանային շուկան չի կարողանում դուրս գալ կոմայից, իսկ գործազրկությունը մնում է ռեկորդային բարձր նիշի վրա:
Վերլուծաբանները, գնահատելով աշխարհի խոշորագույն տնտեսության ապագան, խոսում են նոր անկման հնարավորության մասին: Միաժամանակ վերջին ժամանակները ավելի ու ավելի մեծ հույսեր են կապում նախագահ Բարաք Օբամայի և Դաշնային պահուստի հետ:
ԱՄՆ վիճակագրական տվյալները արդեն վաղուց դադարել են ուրախացնել ներդրողներին: Բացառություն չէր նաև աշխատանքի նախարարության վիճակագրությունը: Տվյալների համաձայն՝ օգոստոսին գործազրկության մակարդակը մնացել է անփոփոխ` 9.1%: Միաժամանակ առաջին անգամ մեկ տարվա մեջ տնտեսությունը չի ստեղծել ոչ մի նոր աշխատատեղ:
