Այսօր Մեսրոպ Մաշտոցի անվան մատենադարանում Կոմիտաս վարդապետի ծննդյան 140-ամյակին նվիրված բացառիկ ցուցադրություն էր կազմակերպվել: Առաջին անգամ հանրությանը ներկայացվում էր Մատենադարանում պահվող այն ձեռագրերը, որոնք ուսումնասիրել է Կոմիտաս վարդապետը` հայոց հին ձայնանիշերի, խազերի վերծանության աշխատանքների ընթացքում:
Ձեռագրերից բացի՝ ցուցադրվում էին նաև Կոմիտասից մնացած մասունքներ. սաղավարտը, դաշնամուրի աթոռը, նամակներ, վկայագրեր, լուսանկարներ:
Վարդապետին նվիրված միջոցառումը իր մեջ ներառում էր նաև գրքերի շնորհանդես: Մատենադարանի աշխատակից Գուրգեն Գասպարյանի հեղինակած 5 գրքերը նվիրված էին Կոմիտաս վարդապետին, նրա հոդվածներին և ուսումնասիրություններին:
Գուրգեն Գասպարյանը իր կատարած աշխատանքի, կոմիտասագիտության ասպարեզում ունեցած նշանակալի ավանդի համար, ինչպես նաև Կոմիտաս վարդապետի ծննդյան 140-ամյակի առթիվ ՀՀ մշակույթի նախարարության կողմից արժանացավ ոսկե մեդալի: