TRT-ի ռուսական ծառայության փոխանցմամբ՝ Թուրքիայի արտգործնախարար Ահմեդ Դավութօղլուն պարզաբանումներ է մտցրել Թուրքիայում ՆԱՏՕ-ի՝ հրթիռային հարձակման սպառնալիքի վաղ զգուշացման ռադիոտեղորոշիչ կայանի (ՌՏԿ) և հեռահար գործողության հրթիռների ծավալման կապակցությամբ։
Դավութօղլուն հայտարարել է. «Հակահրթիռային համակարգը ինտեգրացիոն համակարգ է և ՆԱՏՕ-ի նախագիծն է։ Այսինքն՝ այդ համակարգը չի պատկանում որևէ երկրի։ Այդ նախագծի մշակման ժամանակ մենք ներկայացրել ենք այդ կապակցությամբ մեր մտահոգությունները։
Դրա համար մենք հստակեցրել ենք մի շարք սկզբունքներ. այդ համակարգերը չպետք է ուղղված լինեն որևէ երկրի դեմ, Թուրքիան պետք է ակտիվ դեր խաղա որոշումների ընդունման գործընթացում և այլն։ Թուրքիայի տարածքում նոր ՌՏԿ-ի տեղակայումը կամրագրի ոչ միայն ՆԱՏՕ-ի, այլև հենց Թուրքիայի պաշտպանական ունակությունները»։
Հիշեցնենք, որ սեպտեմբերի 2-ին Թուրքիայի արտգործնախարարության խոսնակ Սելչուք Ունալը լրագրողներին հայտնեց, որ որոշվել է Եվրոպայում հրթիռային հարձակման սպառնալիքի վաղ զգուշացման ՌՏԿ-ն տեղակայել Թուրքիայի տարածքում։
Իսկ հուլիսի վերջին թուրքական Hürriyet թերթը գրել էր, որ Թուրքիայի տարածքում կարող են տեղակայվել ամերիկյան երկու ռադիոտեղորոշիչ կայաններ, որոնց գործունեության շառավիղը կազմում է 7000 կիլոմետր, ինչպես նաև 2500 կիլոմետր հեռահարությամբ կանխազարկ հրթիռներ։
Դրանից օրեր առաջ Ռուսաստանն Անկարա էր գործուղել իր «հրթիռային դեսպան», ՆԱՏՕ-ում Ռուսաստանի մշտական ներկայացուցիչ Դմիտրի Ռոգոզինին՝ որը Թուրքիայի տարածքում ամերիկյան ՌՏԿ-ների ու կանխազարկ հրթիռների տեղակայման, ինչպես նաև Սև ծովում հրթիռակիր ռազմանավերի հայտնվելու անթույլատրելիության կապակցությամբ նախազգուշացրել էր թուրքական կողմին։
Նշվում էր, որ այդ նպատակով Ռուսաստանի նախագահ Դմիտրի Մեդվեդևը պատրաստվում էր այցելել Թուրքիա, սակայն ավելի ուշ հայտնի դարձավ, որ Թուրքիայի նախագահ Աբդուլլահ Գյուլը մասնակցելու է սեպտեմբերի 7-8-ը Մոսկվայից 250 կիլոմետր հեռավորության վրա ընկած Յարոսլավլ քաղաքում տեղի ունենալիք «Գլոբալ քաղաքական ֆորում»-ին, որում կողմերը քննարկելու են նաև ղարաբաղյան հիմնախնդիրը։
