Թուրքական Sabah թերթի փոխանցմամբ՝ Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) զինյալները Թուրքիայի արևելյան հատվածում ընկած Թունջելիի (նախկին Դերսիմ) նահանգում ժամը 21.40-ին երկարափող զենքերով գնդակոծել են ֆուտբոլ խաղացող թուրք ոստիկաններին։ Դրա հետևանքով զոհվել է 2 ոստիկան, վիրավորվել է 8 ոստիկան, որոնցից 3-ի վիճակը գնահատվում է ծանր։
Միևնույն ժամանակ, քուրդ զինյալները հարձակում են գործել Էսենթեփե և Ալիբաբա թաղամասերում գտնվող ոստիկանական հատուկ նշանակության կետերի վրա։ Այստեղ նույնպես գրանցվել են ոստիկանների վիրավորվելու դեպքեր։ Թունջելիի ժանդարմերիայի հրամանատարությունը ստիպված է եղել օդ բարձրացնել «Կոբրա» տիպի ուղղաթիռները, որոնք սկսել են մահաբեր կրակ տեղալ փախուստի դիմած PKK-ականների վրա։
Իսկ երեկ էլ PKK-ականները երկարափող զենքերի օգնությամբ սպանել էին Ժանդարմերիայի լեյտենանտ Բահադըր Ֆուաթ Բուհարալըօղլուին և սերժանտ Բեքիր Էրջիյեսին։
Հիշեցնենք, որ այն բանից հետո, ինչ վերջին շրջանում PKK-ն զգալիորեն ակտիվացավ և մեծ կորուստներ պատճառեց թուրքական ուժային կառույցներին, Թուրքիայի կառավարությունը վճռեց այսուհետ «ահաբեկչության» (PKK-ի) դեմ պայքարում ներգրավել նաև թուրքական ոստիկանությանը։
