Երկու մեքսիկացիներ կարող են դատապարտվել 30 տարվա ազատազրկման Twitter միկրոբլոգների կայքի իրենց էջում կատարված գրառման համար: Այս պահին նրանք գտնվում են մեքսիկական բանտերից մեկում: Ինչպես հայտարարել են դատախազությունում, երկու մեքսիկացու գրառումները Twitter-ում իսկական խուճապ են առաջացրել Վերակրուս քաղաքում: Այս մասին հաղորդում է Associated Press գործակալությունը:
Մեքսիկացիները Twitter-ում գրել են, որ ահաբեկիչները գրավել են Վերակրուսի դպրոցները և պատանդ վերցրել աշակերտներին: Իրարանցման պատճառով քաղաքում գրանցվել են բազմաթիվ ճանապարհատրանսպորտային միջադեպեր: Ծնողները իրենց մեքենաները թողել են ճանապարհներին` շտապելով իրենց երեխաների դպրոցներ:
Բացի այդ, փրկարար ծառայությունների հեռախոսահամարներն անհասանելի են դարձել բազմաթիվ զանգերի պատճառով, ինչը զգալի վնաս է հասցրել այդ համակարգերին: