Երեկ տեղի ունեցավ ֆուտբոլի Եվրոպայի մինչև 21 տարեկանների 2025 թ. առաջնության ընտրական փուլի վիճակահանությունը: Հայաստանի հավաքականն ընդգրկվեց E խմբում, որտեղ մրցակիցները կլինեն Չեռնոգորիայի, Ալբանիայի, Ֆինլանդիայի, Շվեյցարիայի, Ռումինիայի հավաքականները: Մեր հավաքականի գլխավոր մարզիչ Ռաֆայել Նազարյանը մեկնաբանելով վիճակահանության արդյունքը մասնավորապես ասել է․ «Կարելի է ասել, որ հավասարազոր խումբ է՝ առանց շատ թույլ և շատ ուժեղ մրցակիցների: Բոլորն էլ ամուր թիմեր են, իսկ նրանցից երկուսը՝ Ռումինիան և Շվեյցարիան, մասնակցելու են նաև այս տարվա եզրափակիչ մրցաշարին: Նախորդ մրցափուլում Ֆրանսիան համաշխարհային մակարդակի թիմ էր, իսկ այս խմբում վառ ընդգծված ֆավորիտ չկա:Շատ կարևոր է, որ սկսում ենք տնային երկու հանդիպումներով: Պետք է փորձենք առավելագույնը քաղել այդ հանդիպումներից: Նաև լավ է, որ հոկտեմբերին արտագնա առաջին հանդիպումը Ռումինիայում է, որը համեմատաբար ավելի մոտ է, և Շվեյցարիայի հետ խաղից առաջ հոգնածությունն ավելի քիչ կլինի:Օրացույցից ևս գոհ եմ: Սկսում ենք սեպտեմբերին և մինչ այդ ժամանակ կունենանք նոր խաղացողներին տեսնելու ընկերական խաղերում»։
Հիշեցնենք, որ Նազարյանի գլխավորությամբ մասնակցել էր Եվորոպայի առաջնության նախորդ ընտրական շրջափուլին։ Վիճակագրական մի քանի փաստ․ նախորդ հարվա հունիսին այս մասնագետի գլխավորած մեր հավաքականն անց էր կացերլ երեք հանդիպում կրելով նույնքան պարտություն։ Հունիսի 2-ին իր նշանակությամբ Հայաստանի երկրորդ հավաքականը Սկոպյեում 3։1 հաշվով զիջել էր Հյուսիսային Մակեդոնիային։ Հունիսի 6-ին մեր հավաքականը Երևանում 1։4 հաշվով պարտվել էր Ֆրանսիային և վերջապես, հունիսի 12-ին սեփական հարկի տակ 0։2 հաշվով խաղը տանուլ էինք տվել Ուկրաինային։ Սա Ռաֆայել Նազարյանի 8-րդ անընդմեջ պարտությունն էր ընտրական շրջափուլում։ Ավելի վաղը Նազարյանի թիմը խայտառակ 0։7 հաշվով պարտվել էր նաև Ֆրանսիային։ Անցկացնելով 10 հանդիպում այս մասնագետը կրել էր 9 պարտություն։ Միակ հաղթանակը Հայաստանի հավաքականը տարել էր անցյալ տարվա սեպտեմբերին Երևանում 2։0 հաշվով առավելության հասնելով Ֆարերյան Կղզիների հավաքականի նկատմամբ։
Ի դեպ, գաճաճ պետության հավաքականին Նազարյանը «հաջողացրել» էր պարտվել։ Արատագնա խաղում մերոնք զիջել էին նույն 2։0 հաշվով։ Աստեղ հարց է ծագում՝ ի՞նչ գործ ունի Ռաֆայել Նազարյանը Հայաստանի երիտասարդական հավաքականի ղեկին։ Նորմալ է արդյո՞ք ընտրական մրցաշարը բառի բուն իմաստով տապալած մասնագետին շարունակել վստահել հավաքականի գլխավոր մարզչի պաշտոնում։ Այս հարցերի պատասխանները ակնկալում ենք ստանալ ֆուտբոլի ֆեդերացիայից։ Հայկական ֆուտբոլային գերատեսչությունն անցյալ տարվա սեպտեմբերին պայմանագիրը չերկարաձգեց ազգային թիմի իսպանացի գլխավոր մարզիչ Խոակին Կապառոսի հետ, Ազգերի լիգայի B դիվիզիոնում գրանցած արդյունքը համարելով անբավարար։ Հայաստանի հավաքականն այս մրցաշարում 6 խաղում տարել էր մեկ հաղթանակ և կրել 5 անընդմեջ պարտություն։
Ինչո՞ ւ է ՀՖՖ-ն աշխատանքից ազատում 5 անընդմեջ պարտություն կրած մասնագետին, փոխարենը վստահելով 8 անըմդմեջ պարտությունների հեղինակ մարզչին։ Այս հարցի պատասխանը գտնելը բավական դժվար է։ Նշենք, որ խոսքը ազգային թիմի գլխավոր ռեզերվի մասին է։ Ռեզերվ, որը ՀՖՖ-ն կործանում է Նազարյանի ձեռքով։ Փաստենք նաև ՀՖՖ-ում գործում են երկակի ստանդարտներ։ Աբսուրդ է թերևս, որ Ֆարերյանի կղզիներից պարտված մարզիչն այսօր դեռևս խոսում է վիճակահանության արդյունքների, ենթախմբում ընդգրկված հավաքականների հավասարզոր լինելու, նույնիսկ առավելագույնը քաղելու մասին։ Սա թերևս այն դեպքն է, երբ չգիտես ծիծաղել, թ՞ե լաց լինել։
