Հայաստանի քննչական կոմիտեի նախագահ Արգիշտի Քյարամյանը քննիչներին հրահանգել է ուժերի գերլարումով աշխատել 2020 թվականի Արցախյան պատերազմին վերաբերվող քրեական գործերի քննությունն արագացնելու և հանրության ակնկալիքները բավարարելու համար: Արգիշտի Քյարամյանն այդ մասին ասել է Քննչական կոմիտեի կոլեգիայի ընդլայնված նիստի ընթացքում ունեցած ելույթում:
«Ձեր կատարած աշխատանքի արդյունքում պետք է վերջիվերջո բացահայտվեն այն հանգամանքները, որոնց հետևանքով մենք պարտվել ենք: Եվ դա ոչ միայն մեզ համար է կարևոր, ոչ միայն կառավարության համար է կարևոր կամ պետության, դա կարևոր է պատմության համար, դա կարևոր է մեր ազգի, մեր ժողովրդի համար: Կա հասարակական մեծ պահանջ, որպեսզի բացահայտվեն այն անձինք, ովքեր դարձել են պարտության պատճառ, որպեսզի բացահայտվեն այն հանգամանքները, որոնց հետևանքով մենք պարտվել ենք»,- ասել է Քյարամյանը:
Նա հավելել է, որ, չնայած գործերի բարդությանը, չնայած շատ մեծ քանակով ապացուցողական գործողություններ կատարելու անհրաժեշտությանը, պետք է որոշակի ժամկետային սահմանափակումներ դնեն այս գործերի քննության հանգամանքում: «Մենք պետք է հասկանանք, որ ժամանակն անսահման չէ, և այն ակնկալիքները, որ հանրությունն ու քննչական կոմիտեն ունեն այս գործերի քննության ընթացքի վերաբերյալ, պետք է կարճ ժամանակում բավարարվեն: Այնպես որ պետք է ուժերի գերլարումով աշխատենք: Այն բոլոր դրվագները, որոնք արդեն ավարտական տեսք ունեն, պետք է իրացվեն, բոլոր ուղղությունները, որոնք այս ընթացքում պարզաբանվել են, պետք է իրացվեն:
