Թուրքական Hürriyet թերթի փոխանցմամբ՝ թուրքական ընդդիմությունը քննադատել է վարչապետ Էրդողանի գլխավորած «Արդարություն և զարգացում» կուսակցությանը (ԱԶԿ)՝ արտաքին քաղաքական դաշտում ձախողվելու համար։
Թուրքիայի գլխավոր ընդդիմադիր ուժ՝ «Ժողովրդա-հանրապետական» կուսակցության (ԺՀԿ) փոխնախագահ Ֆարուք Լողօղլուն մեկնաբանել է նախորդ տարվա մայիսի վերջին գրանցված «Մավի Մարմարա»-ի միջադեպին առնչվող ՄԱԿ-ի զեկույցի հրապարակումը և դրան հաջորդած Իսրայելի նկատմամբ Թուրքիայի արտգործնախարար Ահմեդ Դավութօղլուի հայտարարած պատժամիջոցները.
«Մենք հետևում ենք մեր կառավարության անհաջող արտաքին քաղաքականությանը։ ՄԱԿ-ի զեկույցի հրապարակումն ի ցույց է դնում ԱԶԿ-ի արտաքին քաղաքականության տապալումը։ ԱԶԿ-ն Թուրքիային ներքաշում է Իսրայելի հետ տաք հակամարտության մեջ»։
Հիշեցնենք, որ երեկ Դավութօղլուն հայտարարել է, թե քանի որ Իսրայելը ներողություն չի խնդրել «Մավի Մարմարա»-ի միջադեպի համար, իրենք ձեռնարկելու են նախապես խոստացված պատժամիջոցները. «Նվազագույն մակարդակի են իջեցվելու թուրք-իսրայելական հարաբերությունները՝ հասցվելով ժամանակավոր հավատարմատարի (երկրորդ քարտուղարի) մակարդակին։ Չորեքշաբթի օրը երկու երկրների դիվանագիտական ներկայացուցիչները վերադառնալու են իրենց երկրներ։
Առկախվելու են Իսրայելի հետ կնքված բոլոր ռազմական համաձայնագրերը։
«Մավի Մարմարա»-ի միջադեպի ժամանակ տուժած թուրքերի հարազատներն Իսրայելի դեմ դիմելու են միջազգային դատարաններ։ Թուրքիան չի ճանաչում Իսրայելի կողմից Գազայի հատվածի շրջափակումը և անելու է հնարավորը՝ «Մավի Մարմարա»-ի միջադեպը Արդարադատության միջազգային դատարանում քննելու համար»։
