11-րդ օրն է՝ Արցախը շրջափակման մեջ է. իրավիճակին կրկին տեսակապով անդրադարձել է ԱՀ պետական նախարար Ռուբեն Վարդանյանը:
Նա արցախցիներին խնդրել է հոգեբանորեն դիմագրավել իրավիճակին:
«Մենք հասկանում ենք, որ լուծումը պետք է լինի այնպես, որ մեր արժանապատվությունը չկորցնենք, այնպիսի լուծում պետք է գտնենք, որոնց հետևանքները Արցախում հանգիստ ապրելու և Ադրբեջանից կախված չլինելու հնարավորություն տան: Իսկապես իրավիճակը ծանր է, գիտեմ և՛ սննդի, և՛ բենզինի հետ կապված խնդիրները, մենք փորձում ենք լուծումներ գտնենք: Այսօր էլ հանդիպել ենք ծնողների հետ, որոնց երեխաները գտնվում են Հայաստանում, հասկանանք՝ ինչ կարելի է անել:
Մենք ունենք խնդիր, որ ցավոք մի քանի մարդ մահացել է, և դիակները չենք կարողանում բերել Արցախ, ունենք խնդիրներ, որ ընտանիքները բաժանված են, արդեն 11-րդ օրն է, դառնում է ավելի լուրջ և երկարաժամկետ խնդիր»,-ասել է Վարդանյանը:
Նա նշել է, որ պատասխանատու են, թույլ չեն տալու ոչ մեկին իրավիճակը դարձնեն քաոսային և լրատվամիջոցներով պետք է մանրամասն հայտնեն, թե ինչ է կատարվում:
Նա խոսել է իր զգացողությունների մասին, պատմել հայաստանցի ընկերոջ հետ զրույցի մասին, ում ասել է.
«Հիմա ամենաերջանիկ ժամանակն է իմ կյանքում , ասում եմ՝ ես երջանիկ մարդ եմ, ես 54 տարեկան լինելով, հաջողված բիզնեսմեն, հայր, տղա, հայր լինելով՝ ամենաերջանիկ օրերն են, որ աշխատում եմ իմ ազգի համար, իմ գիտելիքները, փորձը դրել եմ ամենակարևոր բանին, ոնց անեմ, որ իմ հայրենիքը մնա անկախ, ինքնուրույն: Այս ամենածանր իրավիճակում ունենանք այս զգացողությունը ոչ թե միայն մեր համար, այլ մեր ապագա սերունդների համար»,-կոչ է արել Արցախի պետական նախարարը:
