Դեկտեմբերի 8-ին ԱՄՆ ու Ռուսաստանը հայտարարել են փոխադարձաբար բանտարկած քաղաքացիների փոխանակման մասին, որը տեղի է ունեցել Աբու Դաբիի օդանավակայանում: Ռուսաստանը ազատ է արձակել ամերիկացի բասկետբոլիստուհի օլիմպիական խաղերի և աշխարհի չեմպիոնուհի 32-ամյա Բրիթնի Գրայներին, իսկ ԱՄՆ-ն ազատ է արձակել ՌԴ քաղաքացի Վիկտոր Բուտին, որն իհարկե ոչ պաշտոնապես, սակայն համարվում է ՌԴ հատուկ ծառայությունների աշխատակից: ԱՄՆ իշխանությունը նրան մեղադրում էր զենքի անօրինական առևտրի համար:
Բուտը ձերբակալվել էր 2008 թվականին՝ Թայլանդի մայրաքաղաք Բանգկոկում, հետո տեղափոխվել ԱՄՆ և 2012 թվականին դատապարտվել 25 տարվա ազատազրկման, չնայած այդ ընթացքում ՌԴ-ն փորձում էր վիճարկել նրա մեղադրանքն ու հասնել արտահանձնման: Ամերիկացի բասկետբոլիստուհին ձերբակալվել է ամիսներ առաջ՝ 2022 թվականի փետրվարի 17-ին, այսինքն Ուկրաինայի դեմ ՌԴ ռազմագործողությունից մեկ շաբաթ առաջ: Նրան ձերբակալել են Մոսկվայի Շերեմետևո օդանավակայանում, իր մոտ եղած էլեկտրոնային ծխախոտի համար, որը եղել է հաշիշի յուղով: ԱՄՆ-ում դա արտոնված է, իսկ ՌԴ-ում՝ արգելված: Գրայներին դատապարտեցին 9 տարվա ազատազրկման:
Գևայներին Բուտի հետ փոխանակելու շփումներն ու բանակցությունը թե բաց, թե խորհրդապահական ռեժիմում ընթանում է արդեն ամիսներ և դրան ներգրավված են եղել ընդհուպ արտգործնախարարներ Բլինքենն ու Լավրովը, որոնք հաղորդակցվել են այդ «առիթով»: Արդյո՞ք արտգործնախարարները շփվել են զուտ այդ փոխանակման հարցերի համար: Հազիվ թե: Ըստ ամենայնի, փոխանակման թեման եղել է շատ ավելի մեծ քաղաքական քննարկումների և սակարկության առիթ, ինչն էլ անհրաժեշտություն է դարձրել ընդհուպ արտաքին գործերի նախարարների մակարդակով շփումները, այն դեպքում, երբ ուկրաինական պատերազմից ի վեր նրանք գործնականում չեն հաղորդակցվել: Ի դեպ, ամերիկյան կողմը «փոխանակման փաթեթի» մեջ դիտարկում էր նաև Պոլ Ուլիանին, ԱՄՆ մեկ այլ քաղաքացի, որը 16 տարվա ազատազրկման է դատապարտված Ռուսաստանում՝ լրտեսության համար:
Սակայն, Ուլիանը չի փոխանակվել և տեղեկություն է տարածվել, որ Ռուսաստանը կտրականապես մերժել է, համարելով, որ այդ դեպքում փոխանակումը կլինի անհամաչափ: Սակայն, այստեղ ուշադրության է արժանի փաստը, որ փոխանակումը ամիսներ շարունակ տարբեր մակարդակներում և ձևաչափերով քննարկելու ընթացքում տեղեկատվության մեջ նշվում էր նաև Ուիլանի մասին, ու այդ ժամանակ չէր խոսվում ՌԴ կտրուկ մերժման վերաբերյալ: Նշանակու՞մ է դա արդյոք, որ «փոխանակման փաթեթում» քննարկվել են նաև տարրեր, որոնք հավանական են դարձրել «եկուսը մեկի դիմաց» հնարավորությունը, սակայն հետագայում չի եղել համաձայնություն, ԱՄՆ թերևս հրաժարվել է որոշակի քայլերից կամ համաձայնություններից, ինչից հետո էլ ՌԴ հհրաժարվել է այդ «բանաձևով» փոխանակումից և փոխանակումը եղել է «մեկը մեկի դիմաց» սկզբունքով: Սա իր հերթին նշանակում է, փաստորեն, որ ՌԴ «ձեռքում» մնում է բանտարկված մեկ ԱՄՆ քաղաքացի: Հարց է առաջանում, թե ինչ է մնում ԱՄՆ ձեռքում: Բոլոր դեպքերում կարծես թե այդ կերպ պահպանվում է ամերիկա-ռուսական քննարկումների և հաղորդակցության շարունակության լեգիտիմ «առիթ»: