Էկոնոմիկայի նախարար Վահան Քերոբյանը դեռ մարտ ամսին հայտարարեց, որ 2022թ.-ի հունիսի 15-ից Սև ծովի «Փոթի» և «Կավկազ» նավահանգիստների միջև շաբաթական երկու անգամ կգործարկվի երկկողմանի լաստանավային հաղորդակցություն։ Հունիսին նախարարը, անդրադառնալով լաստանավերի շահագործմանը, հայտարարեց, թե լաստանավի գործարկումը օրերի հարց է։ Շուտով կհրապարակվի չվացուցակը: Ավելի ուշ Քերոբյանը հայտարարեց, որ ձգձգումը մեծապես պայմանավորված է Ռուսաստանի Դաշնության դեմ սահմանված պատժամիջոցներով: Հիմա էլ խոստանում են, որ մինչև տարեվերջ այն կգործարկվի: Իսկ մինչ այդ՝ Լարսը շարունակում է ծանրաբեռնված աշխատել, բեռնատարները շաբաթներով սպասում են իրենց հերթին:
«Օրիգինալ տրանսպորտ գռուպ» ՍՊԸ տնօրեն Վարուժան Քոլյանը «Առաջին լրատվական»-ի հետ զրույցում նշեց, որ այս պահին իրականում Լարսում լարվածությունը պահպանվել է, հերթերը շարունակվում են.«Երեկ և այսօր նաև հերթեր առաջացան ռուսական հատվածի կողմից: Արդեն երկու օր է՝ մոտ հինգ հարյուր մեքենայի չափ կուտակում ունենք»,-նշեց Քոլյանը:
Վրացական կողմից այս պահին օրական 400 մեքենայի թողունակություն է ապահովվում, սակայն նվազել է ռուսական կողմի թողունակությունը:
Լաստանավերի գործարկման հետ կապված հայ բեռնափոխադրողները որևէ ակնկալիք չունեն. «Ըստ իրենց տված տեղեկատվության՝ մեքենաներ չեն տեղափոխելու և այս առումով որևէ հարց չեն լուծելու: Միայն գուցե արտահանողների և ներմուծողների համար վագոնով բեռներ տեղափոխեն: Լաստանավը լուծում կտա միայն այն ներմուծողների և արտահանողների խմբին, որոնք մեքենաներով չեն իրականացնում բեռնափոխադրում: Եվ եթե Լարսը ձմռան ամիսներին փակ լինելի, լաստանավող կիրականացվեն բեռնափոխադրումներ: Իսկ կոնկրետ մեքենաներով սահմանը հատող հայ արտահանողին որևէ օգուտ չի տալու»,-ասաց Քոլյանը:
Նա նաև նշեց, որ վրացական կողմում մաքսատուրքերն են ավելացել.
«Վրաստանի տարածքով անցնելը նախկինում 200 լարի էր, հիմա 350 լարի է, այսինքն՝ սահմանը Վրաստանով անցնելու և հետ գալու համար վճարում ենք 700 լարի: Գումարած դրան ավոտակայանատեղիների գումարը՝ 80 լարի, այսինքն՝ 860 լարի է կազմում, նախկինում 460 էր կազմում ամբողջը»:
Նրա խոսքով՝ հայ բեռնափոխադրողն այս ամիսներին հսկայակական վնասներ են կրել.«Մեքենան գնում ենք վարկով և ակնկալում, որ ամսվա ընթացքում երկու-երեք երթ իրականացնենք, իսկ եթե մի ամսում մեկ անգամ է իրականացվում, ինչպե՞ս եք պատկերացնում, որ նա կարողանա բոլոր ծախսերը փակել: Իմ մեքենան այսօր հետ է վերադառնում Կրասնոդարից, ամիս ու մեկ օր գնացել է Կրասնոդար և հետ եկել, բայց սա դեռ լավագույն դեպքում: Խաշուրիով գնաց մեր մեքենան, մի քիչ արագ ստացվեց, Բագրատաշենով գնացողները մի քիչ երկար կարող են կանգնած մնալ: Մեքենան եկամտաբերությունը կորցնում է, ավտոմատ գները բարձրանում են:
Բարձր գին, ոչ մրցակցային ապրանք ԵԱՏՄ շուկայում, ապրանքն է թանկանում: Իսկ բեռնափոխադրողը փորձելու է այսքան երկար կանգնելու ֆոնին մի քիչ գումար ավել ուզել, որ կարողանա ծախսերը փակել: Բացի այդ, վարորդների տաժանակիր, դժվար աշխատանքը հակասանիտարական պայմաններում, կենցաղային պայմաններից զրկված են, գնում են անապատային հատվածներով, որտեղ անգամ սանհանգույց չկա: Ճանապարհներին ոչ խանութ կա մոտ, ոչ սանհանգույց»,- ասաց Քոլյանը՝ հավելելով, որ այսօր շատ վարորդներ արդեն հրաժարվում են այս աշխատանքից, քանի որ համբերությունը տեղի է տալիս:
