Ուսումնական տարվա սկզբին տեղի ունեցավ Քարվաճառի (այժմ՝ Շահունյանի) շրջանի նոր միջնակարգ դպրոցի հանդիսավոր բացման արարողությունը՝ ԼՂՀ վարչապետ Արա Հարությունյանի ներկայությամբ։ Երկու տարի տևած շինարարական աշխատանքներից հետո Քարվաճառի բնակիչները ստացան երկար սպասված նվերը՝ նոր միջնակարգ դպրոցը։
Տեղեկացնենք, որ դպրոցը հիմնադրել է Դավիթ Առուստամյանը, ով եղել է դպրոցի առաջին ուսուցիչը և տնօրենը։ Այդ տարիներին դպրոցը գործել է մի փլատակ շինության մեջ՝ մինչև 2000 թվականը, երբ Էրումյան պարսկահայ ընտանիքի նվիրատվությամբ կառուցվեց Քարվաճառի առաջին լիարժեք միջնակարգ դպրոցը։ Ինչպես «Առաջին լրատվականի» հետ զրույցում տեղեկացրեց Քարվաճառի բնակիչ Ալեքսանդր Քանանյանը, ԼՂՀ կառավարության որոշմամբ երկու տարի առաջ սկսվեց նոր շինարարությունը, որը պետք է փոխարիներ Էրումյանների կառուցած Սարոյանի անվան դպրոցին։
Ա. Քանանյանի փոխանցմամբ՝ ներկա դպրոցը նախատեսված է 240 աշակերտի համար։ «Այս պահին այդքան աշակերտ չկա, բայց հիմքեր կան ակնկալելու, որ մեկուկես տարվա ընթացքում աշակերտների թիվը կգերազանցի 200-ը։ Այսօր արդեն դպրոցը լիարժեք աշխատում է, դասարանները հարմարեցված են, իսկ գույքը՝ համալրված, անձնակազմը մնացել է նույնը»,- նշեց Քարվաճառի բնակիչն՝ ընդգծելով, որ դպրոցը շատ ավելի շքեղ է, քան վարչակազմի շենքը։
Խոսելով Քարվաճառի մարզում բացված նոր դպրոցի մասին՝ պետք է նշել նաև, որ ազատագրած տարածք՝ Քաշաթաղի շրջանի Բերձոր շրջկենտրոնում ամառվա ընթացքում վերանորոգվել է Արվեստի և սպորտի դպրոցը, որի բացումը նույնպես տեղի է ունեցել ուսումնական տարվա սկզբին։ Դպրոցն ունի մի քանի խմբակ՝ սպորտ, պարարվեստ, նկարչություն, դիզայն, մոդելավորում, բատիկա, ֆոտոարվեստ։ Դպրոցը վերանորոգվել է «ՅԱԿ-40» ինքնաթիռի հրամանատար Ճաղարյան Հակոբի և նրա տիկին՝ նկարչուհի Զարուհի Մուրադյանի միջոցներով։
