«Առաջին լրատվական»-ի զրուցակիցն է Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանը։
-Տիկին Վարդանյան, Դեմոկրատները պահպանել են վերահսկողությունը Միացյալ Նահանգների Սենատում, հնարավոր է չնչին տարբերությամբ զիջեն իրենց տեղը Ներկայացուցիչների պալատում։ Այս պատկերն ինչպե՞ս կանդրադառնա Հայաստանի, հայկական հարցերի վրա։
–Իհարկե դեռևս ամբողջական, վերջնական արդյունք չկա, բայց տպավորություն է, որ այո՛ դեմոկրատները վերահսկողություն կունենան Սենատում։ Դեռ մի նոր ընտրություն պետք է լինի Ջորջիա նահանգում, որովհետև 50+1 տոկոս ոչ մի թեկնածու չէր ապահովել։ Եթե դեմոկրատներն այստեղ ևս առաջընթաց ունենան, կարող ենք արձանագրել, որ առավել ևս մեծամասնություն կա։ Ներկայացուցիչների պալատում առայժմ գործընթացը չի ավարտվել, հաշվարկներն ընթացքի մեջ են։ Ճիշտ է՝ հիմա տպավորություն է, որ հանրապետականները կարող են շահել, բայց քանի որ չի վերջացել՝ հստակ չենք կարող ասել։ Միակ բանը, որ հստակ է՝ այն է, որ ամեն մի ձայն կարևոր է, մինչև չհաշվեն բոլոր քվեաթերթիկները՝ չենք կարող ասել, թե ինչ կլինի։
Հիմա անդրադառնանք, թե ինչ անդրադարձ կունենա մեր վրա։ Մենք նշել ենք, որ հայկական հանձնախմբի մեծամասնությունը հաղթել է։ Ով չի հաղթել, նշանակում է, որ մենք առավել ևս պետք է շատ աշխատենք։ Պետք է շարունակենք աշխատել Ներկայացուցիչների պալատի բոլոր անդամների հետ, որ համոզենք, որ նրանք միանան այդ հանձնախմբին։ Դա չի նշանակում, որ մենք աշխատելու ենք միայն դեմոկրատների հետ։ Մենք աշխատելու ենք թե՛ դեմոկրատների և թե՛ հանրապետականների հետ։ Երկու կուսակցությունների հետ էլ աշխատում ենք։ Եկող շաբաթների ընթացքում արդեն ամեն բան ավելի հստակ լինի։
Մեր կազմակերպությունը, մեր համայնքը, ամերիկահայերը շատ մեծ գործ ունեն անելու։
-Այն, որ դեմոկրատներն այս ընտրություններում լավ արդյունքներ գրանցեցին, ի՞նչ է նշանակում՝ մարդիկ գոհ են Բայդենի վարչակազմի՞ց, թե պարզապես դեմ են, որ Թրամփը վերադառնա։
–Կային մարդիկ, ովքեր ունեին Թրամփի աջակցությունը, բայց չհաղթեցին։ Օրինակ Սենատի ընտրությունների հետ կապված Փենսիլվանիա նահանգում, որտեղ դոկտոր Օզը չհաղթեց։ Թրամփի աջակցությունը փաստորեն չի օգնել։ Բայց ընդհանուր առմամբ կարող ենք արձանագրել, որ ԱՄՆ-ում դեմոկրատական պրոցեսն աշխատել է։
-Ամեն դեպքում Հայաստանի խնդիրներով, հայկական հարցերով ավելի շատ դեմոկրատներն են հետաքրքրված և այսպիսի պատկերը նաև մեզ է ձեռնտու։
-Անցյալում այդպես է եղել։ Բայց պետք է նշենք, որ ամերիկահայերի մեջ կան մարդիկ, որոնք աջակցում են ու քվեարկում են հանրապետականների օգտին, մարդիկ էլ կան, որ աջակցում են դեմոկրատներին։