Ինչպես երեկ հաղորդել է Քադաֆիի որդին` Սայֆ Ալ-Իսլամը, իր հայրը ողջ և առողջ է, և դեռ պատրաստվում է դիմակայել ապստամբներին ու հաղթել նրանց: Հեռուստաալիքին տված հարցազրույցում Սայֆ Ալ-Իսլամը հայտարարել է, որ չի բացառում իրենց վերջնական հաղթանակը: Դամասկոսից հեռարձակվող Al-Ray հեռուստաալիքի եթերում նա երդվել է, որ Տրիպոլիի կանաչ հրապարակն ազատագրվելու է. «Մենք դեռ այստեղ ենք: Դիմադրությունը շարունակվում է, իսկ հաղթանակը մոտ է»,- ասել է նա:
Տարօրինակ է, բայց Սայֆ Ալ-Իսլամի հայտարարությունը համընկել է նրա մեկ այլ եղբոր` Սաադի հայտարարության հետ, որը հայտարարել է, որ պատրաստ է բանակցությունների և կհանձնվի, եթե դա կօգնի դադարեցնել արյունահեղությունը: Ընդ որում՝ Սաադին ասել է, որ ելույթ է ունենում իր հոր անունից: «Ես կասկած չունեմ, որ պետք է հաշտություն նախապատրաստել, այլապես Լիբիային սպասում են կատաղի մարտեր: Ես պատրաստ եմ հանձնվել, եթե դա կօգնի դադարեցնել սպանությունները: Սակայն ինձ կանգնեցնում է այն, որ ես ոչ մի երաշխիքներ չունեմ: Ամեն դեպքում, որպեսզի հասնենք խաղաղ կարգավորման, մենք պետք է նստենք և սկսենք բանակցությունները»,- ասել է Սաադին:
Պարզ չէ, թե ինչու են եղբայրները հակասում մեկը մյուսին, և թե ինչ է թաքնված այս հակասական հայտարարությունների հետևում: