Այն երկրներում, որտեղ այսպիսի կիսաավտորիտար ռեժիմներ են տիրում, ու որտեղ ընտրությունները, որպես կանոն, չկայացած համակարգեր են, այդ երկրներում բարդ է հանրային կարծիքով որևէ ազդեցություն գործել, այն էլ՝ բանակում կատարվող դեպքերի վրա: «Առաջին լրատվականի» հետ զրույցում, խոսելով հանրային կարծիքի դերի ու նշանակության մասին, ասաց «Հրապարակ» թերթի գլխավոր խմբագիր Արմինե Օհանյանը:
Նրա խոսքով, այդուհանդերձ, Պաշտպանության նախարարությունը լսում ու ուշադիր հետևում է մամուլի հրապարակումներին ու միայն այն փաստը, որ ցանկացած փոքրիկ լուրից հետո արձագանքում ու հերքում են տեղադրում, դա ամեն դեպքում վկայում է այն մասին, որ դա իրենց «կպչում է, խանգարում է»:
«Նրանք հետաքրքրված են հանրային կարծիքի ձևավորմամբ: Այն երկիրը, որտեղ քաղաքացիական հասարակությունը ակտիվ է, պայքարում է իր իրավունքների համար, հասնում է արդյունքի: Չի կարող այնպես լինել, որ արդյունք չտա»,- ասաց Ա.Օհանյանը՝ նշելով, որ այդ առումով ինքը լավատես է ու ժամանակի ընթացքում հասարակական կարծիքն ավելի խիստ կդառնա ու ավելի շատ մարդիկ կներգրավվեն հասարակական գործընթացներում:
Նա կարևորեց նաև ներկայում ձևավորված հասարակական տարբեր կազմակերպությունների, քաղաքացիական, Facebook-յան տարբեր շարժումների գոյությունը:
