Վրացի քաղաքական վերլուծաբան Պաատա Զաքարեաշվիլին «Առաջին լրատվականի» հետ զրույցում նկատեց, որ թեև Աբխազիայի ընտրությունները չեն համապատասխանել Վրաստանի օրենսդրությանն ու միջազգային իրավունքին և դրանց արդյունքները չեն կարող ունենալ իրավական նշանակություն, սակայն դրանք եղել են արդար և ժողովրդավարական:
Ըստ վերլուծաբանի՝ Աբխազիայի ընտրությունների արդյունքները արտացոլում են այն տրամադրվածությունը, որը այժմ կա Աբխազիայում:
Նկատենք, որ օգոստոսի 26-ին կայացած ընտրությունների արդյունքում 51 տոկոս ձայնով Աբխազիայի նախագահ է ընտրվել Ալեքսանդր Անկվաբը:
«Անկվաբի հաղթանակը սպասելի էր, նա անպայման պետք է նախագահ դառնար, սակայն ոչ ոք չէր սպասում, որ Շամբան այդքան ցածր ցուցանիշ կունենա»,- նշեց Զաքարեաշվիլին:
Նա նաև նկատեց, որ Անկվաբը հայտնի քաղաքական գործիչ է և համարվում է հավասարակշռված, սկզբունքային, խիստ մարդ և կարող է կատարել այն բոլոր խոստումները, որոնք տվել է աբխազ ժողովրդին:
Ինչ վերաբերում է վրաց-աբխազական հարաբերությունների ճակատագրին, Զաքարեաշվիլին նշեց, որ դրանք դադարել են ոչ թե աբխազական կողմի մեղքով, այլ վրացական, երբ 2006 թ. վրացական կողմը խախտեց Մոսկովյան համաձայնագիրը: Ըստ վերլուծաբանի՝ Վրաստանը քայլ պետք է անի Աբխազիային ընդառաջ, եթե ցանկանում է վերականգնել բանակցային գործընթացը. «Անկվաբն իր նախընտրական քարոզարշավի ժամանակ հայտարարել էր, որ ինքը պատրաստ է վրացական կողմի հետ բանակցություններ վարել առանց որևէ նախապայմանի, սակայն դեռևս վրացական կողմից որևէ արձագանք չկա»:
Վրացի քաղաքական վերլուծաբանը նկատեց, որ շատ նորմալ է, որ ռուսական շահերը պետք է առաջնահերթ հաշվի առնվեն Աբխազիայում, սակայն, նրա դիտարկմամբ, երեք թեկնածուներից Անկվաբը Ռուսաստանի համար պակաս ցանկալի թեկնածու էր, ու հենց այդ պատճառով էլ նա հաղթեց ընտրություններում. «Ամենակարևոր հանգամանքը, որի պատճառով պարտվեց Շամբան, նրա ռուսամետությունն էր, որը շատ ցայտուն էր: Փաստացիորեն, ընտրելով Անկվաբին, աբխազները ընտրել են ազգայնականությունը և աբխազ ժողովրդի գերակայությունը ռուսներից, քանզի Անկվաբը հայտնի է Ռուսաստանի հասցեին սուր հայտարարություններով: Նա թեև կարծում է, որ Ռուսաստանը պետք է ապահովի Աբխազիայի անվտանգությունը, սակայն դա պետք է լինի չափի մեջ և ոչ այնպես, ինչպես Ռուսաստանն է ցանկանում, այլ այնպես, ինչպես երկուստեք կպայմանավորվեն»: