Այսօր հայտնի դարձավ, որ Ղրիմի կամրջի պայթյունի քրեական գործով կալանավորել է ութ մարդ, որոնցից մեկը Հայաստանի քաղաքացի Արթուր Թերջանյանն է։ ՀՀ Գլխավոր դատախազությունը հանդես է եկել հայտարարությամբ, առ այն, որ ուսումնասիրում է Ղրիմի կամրջի պայթյունի գործով Ռուսաստանի Անվտանգության դաշնային ծառայության այսօր տարածած տեղեկությունները, այն հասցեագրել է Ազգային անվտանգության քննչական դեպարտամենտ՝ քրեական վարույթ նախաձեռնելու հարցը լուծելու հանձնարարությամբ:
Ղրիմի կամրջի պայթյունի գործով հանգամանքների ամբողջական բացահայտումը չափազանց կարևոր է, որպեսզի Հայաստանի քաղաքացու հասցեին հանիրավի որևէ մեղադրանք չլինի։ Իսկ եթե կա հիմնավոր մեղադրանք կամ կասկած, ապա այն իհարկե պետք է ստանա համապատասխան գնահատական ու ընթացք, և թե չլինի Հայաստանի հանդեպ քաղաքական շահարկում: Առավել ևս կասկած չկա, որ լինելու են թե ռուսաստանյան, թե ադրբեջանական, թե թուրքական շրջանակներ, որոնք արդեն իսկ ձեռնմուխ կլինեն Հայաստանի հասցեին այդ շահարկումներին, ինչպես անում են որևէ այլ մեծ կամ փոքր առիթի դեպքում:
Միևնույն ժամանակ, այստեղ շատ կարևոր է, որ դրանց չտրվի նաև հանրությունը, ընդ որում՝ որևէ իմաստով, լինի Հայաստանի հանդեպ շահարկումների, թե Հայաստանում ՌԴ անվտանգության կառույցների հանդեպ շահարկումների փորձերին: Սրանից զատ, կա թերևս մեկ այլ հանգամանք, անմիջականորեն Հայաստանի անվտանգությանն առնչվող: Եթե ՌԴ ԱԴԾ հաղորդագրությունը չի պարունակում մտացածին դրվագներ, ապա Հայաստանի համար շատ կարևոր է քննության գործին ներգրավվածությունը մեկ այլ հարցի պատասխանի համար՝ ինչպե՞ս է պայթուցիկով բեռը անցել Հայաստանով, որովհետև այս դեպքում հանգամանքների պարզումը շատ կարևոր է նաև անմիջականորեն Հայաստանի հանրապետության անվտանգության ապահովման կարողությունը, կանխարգելիչ կարողությունը բարձրացնելու համար, հաշվի առնելով նաև չափազանց զգայուն աշխարհաքաղաքական միջավայրից բխող անվտանգության հարաճուն ռիսկերը:
Արման Բաբաջանյան Հանուն Հանրապետության կուսակցություն նախագահ
