Վրացական «Ալիա» թերթին տված հարցազրույցի ժամանակ ընդդիմադիր կողմնորոշում ունեցող Վրաստանի Հանրապետական կուսակցության ներկայացուցիչ Դավիթ Զուրաբիշվիլին հայտարարել է, թե Ռուսաստանն ու Արևմուտքը պահանջում են, որ Սաակաշվիլին լքի իր պաշտոնը.
«Ռուսաստանն ու Արևմուտքը կտրուկ պահանջում են, որ նախագահական ժամկետի լրանալուց հետո նա չմնա իր պաշտոնում։ Սաակաշվիլիից պահանջում են, որ 2013 թվականի ընտրություններից հետո նա չզբաղեցնի ո՛չ նախագահի, ո՛չ էլ վարչապետի պաշտոնը։ Դա նշանակում է, որ նա շատ բարդ դրության մեջ է։ Հետևաբար, Սաակաշվիլին շտապելու բան չունի և փորձելու է ամերիկացիներին համոզել, որ Վրաստանի տիրակալը դարձյալ պետք է ինքը լինի։
Սակայն ես վստահ եմ, որ նա ինքն էլ չգիտի, թե ինչ պաշտոն է զբաղեցնելու ապագա կառավարությունում. արդյոք լինելո՞ւ է վարչապետ, խորհրդարանի խոսնակ, թե՞ ներդնելու է առաջնորդի նոր կարգավիճակ, ինչպիսին Սինգապուրում է։ Չգիտեմ՝ նա ինչ է մտածում, բայց միանշանակ է, որ ցանկություն կա մնալու երկրի առաջնորդ։
Արևմուտքին իր անփոխարինելիությունն ապացուցելու համար Սաակաշվիլին փորձելու է նորից ստեղծել ռուսական կամ ընդդիմության սպառնալիքի ֆոն։ 2012 թվականի խորհրդարանական ընտրությունները երկրի համար կլինեն բեկումնային»։