«Առաջին լրատվականի» այն հարցին, թե ինչքանով է նպատակահարմար, որ ՀՀ-ն ինքնուրույն է իրականացնում Մեծամորի ԱԷԿ-ի սթրես-թեստը, Ատոմային էներգետիկայի վարչության պետ Արամ Գևորգյանը պատասխանեց. «Եթե լինեն վթարներ, երկրաշարժեր և դրսից բոլոր էլեկտրահաղորդման գծերն անջատվեն, հոսանք չմտնի կայան, ինչ պետք է անի կայանը, որպեսզի կարողանա դիմակայել սթրեսին: Դա ով պետք է անի, եթե ոչ մեր աշխատակիցները, քանի որ ավելի լավ գիտեն կայանի վիճակը, ինչ սարքեր ունենք, որը ինչ հնարավորություն ունի: Այդ արդյունքները այնուհետև ստուգվում են հատուկ հսկողության կողմից` ճիշտ է, թե` սխալ, հետո եվրոպական փորձագետներն իրենք են նայում, եթե մենք ինչ-որ բան նկատած չլինենք, փորձագետները կարող են ուղղումներ մտցնել, և այդ ամենը նշվում է թղթում»:
«ԵՄ-ն առաջարկել է, որ բոլոր եվրոպական կայաններում անցկացվեն սթրես-թեստեր և դիմել է հարևան երկրներին՝ Շվեյցարիա, Ռուսաստան, Ուկրաինա և Հայաստան, որոնք ԵՄ հարևան երկրներ են և ունեն ատոմային կայաններ:
Ռուսներն ասել են, որ առանց իրենց դիմելու էլ թեստերն անցկացվում են, իսկ հայկական կողմը ասել է, որ եթե անհրաժեշտություն լինի՝ օգնեն իրենց: ԵՄ-ը սահմանում է խնդիրները, վթարների ցանկը և ասում, թե ինչպես պետք է պաշտպանվել»,- ասաց վարչության պետը:
Տարվա վերջին ԵՄ երկրները կներկայացնեն արդյունքները, իսկ եկող տարվա կեսին ՀՀ-ն կտրամադրի վերջնական արդյունքները:
Հիշեցնենք, որ հունիսի 23-ին Հայաստանը, Խորվաթիան, Ռուսաստանը, Թուրքիան, Ուկրաինան և Բելառուսը ԵՄ կողմից մշակված՝ ԱԷԿ-ների սթրես-թեստերի իրականացում ենթադրող հռչակագիր են ստորագրել: