Հայկական համացանցում, փորձագիտական-քաղաքական շրջանակներում ակտիվորեն քննարկում է EconomicTimes-ի հրապարակած տեղեկությունն այն մասին, որ DefenceIndia-ն Հայաստանի հետ հրթիռների, արկերի և ռազմամթերքի մատակարարման բավականին խոշոր պատվեր է ստորագրել: Հայաստանի և Հնդկաստանի կառավարությունները, ըստ աղբյուրի, զենքի և զինամթերքի անխափան մատակարարումն ապահովող միջպետական մի շարք պայմանագրեր են ստորագրել ավելի վաղ`այս ամսվա ընթացքում: Հայաստանը Հնդկաստանից կստանա ժամանակակից Պինակա հրթիռներ և հակատանկային զենք: Ռազմական գործարքի գինը գնահատվում է մոտ 270 միլիոն դոլար: Պինակա հրթիռները ունեն 40 կմ հեռահարություն և ճշգրիտ հարվածի կարողություն: Այս հրթիռային համակարգի բարձր արդյունավետությունն ապացուցվել է Քաշմիրի լեռնային շրջաններում Պակիստանի դեմ պատերազմում: Պաշտոնական հաստատում այս տեղեկությանն առայժմ չկա։
Վրաց փորձագետ, Վրաստանի ռազմավարական վերլուծությունների կենտրոնի ավագ գիտաշխատող Գելա Վասաձեն «Առաջին լրատվական»-ի հետ զրույցում, անդրադառնալով այս տեղեկությանը, ասաց․ «Դե ո՞նց կարելի է սա գնահատել, դա բացարձակապես նորմալ է, Հայաստանը հոգ է տանում իր անվտանգության մասին, Ռուսաստանը երկար ժամանակ չի կարող դա ապահովել, և ինչքան այսպես շարունակվի, այնքան վատ։ Իսկ դա սկսվել է ուկրաինական պատերազմից առաջ։ Ընդգծում եմ, որ Մոսկվան ոչ թե չի ցանկանում, այլ չի կարող ապահովել Հայաստանի անվտանգությունը»։
Իսկ ուկրաինական իրադարձությունները, ըստ մեր զրուցակցի, մեծացրել են Ռուսաստանի Դաշնության կասկադային փլուզման հավանականությունը, ինչը շատ մեծ աշխարհաքաղաքական ռիսկեր է ստեղծում Հայաստանի համար։ Դեռ շատ վաղուց էր պետք կոտրել աշխարհաքաղաքական տանիքը, սակայն Հայաստանի իշխանություններից ոչ մեկը չհամարձակվեց դա անել։ Ինձ հասկանալի են դրա պատճառները»,-եզրափակեց նա։
Ի՞նչ ճանապարհով հնդկական զենքը կարող է հասնել Հայաստան, Վրաստանն իր օդային կամ ցամաքային տարածքը կտրամադրի՞, Գելա Վասաձեն ասաց․ «Պետք է նայել քարտեզին: Միակ ուղիղ ճանապարհը Իրանով է։ Եթե ենթադրենք, որ Իրանը արգելափակելու է այդ մատակարարումը, ապա դա հնարավոր է նաև Վրաստանի միջոցով։ Ես ուզում եմ, որ ձեր ընթերցողները լավ հասկանան երկու պարզ բան. Նախ՝ Վրաստանում արգելք է դրված ռուսական, կրկնում եմ՝ ռուսական զենքի տարանցման մեր տարածքով՝ ցանկացած երկիր։ Եվ երկրորդը, չնայած այն հանգամանքին, որ այս տարիների ընթացքում Հայաստանը եղել է Ռուսաստանի ռազմաքաղաքական դաշնակիցը, Վրաստանի բոլոր իշխանությունները, հասկանալով, որ մենք հարևաններ ենք, այնուամենայնիվ, բարիդրացիական հարաբերություններ են պահպանում Հայաստանի հետ»։
Հնարավո՞ր է արևմուտքը Վրաստանին հորդորի ապահովել այդ տարանցումը, մեր զրուցակիցն ընդգծեց․ «Արևմուտքը երբեք Վրաստանին իր տարածքով ռազմական տարանցման կոչ չի անի, եթե խոսքը հակառուսական կոալիցիայի դաշնակիցների մասին չէ։ Անհատ քաղաքական գործիչները կարող են, կառավարությունները՝ ոչ»,-եզրափակեց նա։
