ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունեց «Երևանի կոնյակի գործարան» ՓԲԸ սեփականատեր ֆրանսիական «Պեռնո Ռիկար» ընկերության ինստիտուցիոնալ գործերով փոխտնօրեն Ժան Ռոդեշին և «Երևանի կոնյակի գործարան» ՓԲԸ գլխավոր տնօրեն Արա Գրիգորյանին:
Զրուցակիցներն անդրադարձան խաղողի մթերման գործընթացին: Քննարկվեցին նաև գործարանի առաջիկա ծրագրերի, արտադրանքի արտահանման հետ կապված հարցեր:
Փոխվարչապետը տեղեկացրեց, որ Չինաստան կատարած այցի ընթացքում ունեցած հանդիպումներում քննարկվել են հայկական վերամշակող ձեռնարկությունների արտադրանքը, ալկոհոլային խմիչքները Չինաստան արտահանելու հարցեր: Գործարար կապերի խթանման և չինական շուկային ծանոթանալու տեսանկյունից կարևորվել է Չինաստանում անցկացվող ցուցահանդեսներին, տոնավաճառներին հայաստանցի գործարարների, ձեռնարկությունների մասնակցությունը:
Արա Գրիգորյանը տեղեկացրեց, որ ԵԿԳ-ն մասնակցելու է առաջիկայում Ուռումչիում կայանալիք տոնավաճառին, և ընկերությունը հետաքրքիր է համարում չինական շուկայում ներգրավվելու հեռանկարները:
Հանդիպմանը քննարկվեցին նաև Առողջապահության համաշխարհային կազմակերպության` ալկոհոլի դեմ պայքարի գլոբալ ռազմավարությանն առնչվող հարցեր:
