Քաղաքագետների միության նախագահ Հմայակ Հովհաննիսյանի կարծիքով՝ Լիբիայում տեղի ունեցող դեպքերը և դրանց հետագա զարգացումը չափազանց հետաքրքրական են, քանզի այժմ վեճեր են ընթանում, թե որքանով էին հիմնավորված ՆԱՏՕ-ի գործողությունները:
Ըստ Հովհաննիսյանի՝ վիճաբանությունը շարունակվում է, հետևաբար դեռ պարզ չէ, թե ինչպիսին են լինելու հետագա զարգացումները Լիբիայից դուրս. «Դեռևս վաղ է ասել, թե Լիբիայում կիրառված փորձը ինչքանով է կիրառելի և ընդունելի՝ որպես էտալոն նմանատիպ իրավիճակների հաղթահարման համար»:
Քաղաքագետի կարծիքով՝ այսօր դեռ հնարավոր չէ պատասխանել այն հիմնական հարցին՝ արդյոք Արևմուտքի միջամտությամբ կհաջողվի՞ հասնել Լիբիայում և Լիբիայի նման պետություններում սոցիալական համերաշխության հաստատման և ավտորիտար ռեժիմները սանձելուն:
«Արևմուտքը լուրջ խնդիր ունի, քանզի եթե այս անգամ էլ պատմությունը կրկնվեց այնպես, ինչպես Իրաքում, և այստեղ էլ չհաջողվեց հասնել սոցիալական համերաշխության, ապա հասկանալի է, որ այդ միջամտությունը կգնահատվի բացասական»,- նկատեց քաղաքագետը և հավելեց, որ եթե Արևմուտքը ստանձնել է միջազգային ոստիկանի պարտավորություն, ապա պետք է արդյունավետ գործողություններ իրականացնի, քանզի դա արդարացվում է միայն ժողովրդավարություն և կարգուկանոն հաստատելով:
Ըստ Հովհաննիսյանի՝ եթե Արևմուտքի գործողությունները հաջողեն Լիբիայում, ապա այդ փորձը կդիտարկվի որպես միանգամայն ընդունելի, և Լիբիայի նման ռեժիմները պետք է զգուշանան նաև իրենց նկատմամբ այդ փորձի կիրառումից:
