News Georgia-ի փոխանցմամբ՝ ֆրանսիական «Տրիբյուն» թերթին տված հարցազրույցում Վրաստանի էկոնոմիկայի նախարար Վեռա Կոբալիան անդրադարձել է Առևտրի համաշխարհային կազմակերպությանը (ԱՀԿ) Ռուսաստանի անդամակցության խնդրին.
«Վրաստանն ընդհանրապես դեմ չէ ԱՀԿ-ին Ռուսաստանի անդամակցությանը, սակայն ինչպես որ ԱՀԿ-ին անդամակցել ցանկացող յուրաքանչյուր երկիր՝ Ռուսաստանը պետք է պահպանի նրա նորմերն ու կանոնները։
Ռուս-վրացական սահմանին պետք է հաստատվի միջազգային և մասնավորապես ԵՄ-ի ու ԱՄՆ-ի մակարդակով ճանաչված մաքսային վերահսկողություն։ Դա տնտեսական և ոչ թե քաղաքական պահանջ է։ Սահմանով փոխադրվող բեռները պետք է վերահսկվեն այնպես, ինչպես որ ռուս-ֆիննական սահմանին է»։
Հիշեցնենք, որ Ռուսաստանը փորձում է ԱՀԿ-ին անդամակցել 1993 թվականից, ինչի վրա շարունակ վետո է դնում Վրաստանը։ ԱՀԿ-ին անդամակցելու վերաբերյալ ռուս-վրացական բանակցությունների հերթական փուլը մեկնարկելու է սեպտեմբերի 12-ին Շվեյցարիայում։
Դրանում վրացական կողմը հերթական անգամ առաջ է քաշելու աբխազական ու հարավօսական հատվածներում մաքսային անցակետերի օրինականացման հարցը։ Մինչդեռ ռուսական կողմն առաջարկում է այդ խնդիրը քննարկել ոչ թե իր, այլ Աբխազիայի ու Հարավային Օսիայի հետ։