ԱՄՆ պետդեպին ուղղված նամակում ԼՂՀ իշխանությունը քննադատել է 2008 թ. տարեկան զեկույցի հեղինակների օգտագործած տերմիանբանությունը՝ զեկույցի լեզուն որակելով միակողմանի և ոչ օբյեկտիվ: ԼՂՀ կառավարության նամակը հրապարակում է Wikileaks-ը:
Նամակում Լեռնային Ղարաբաղի կառավարությունը հայտնում է, որ բարձր է գնահատում ԱՄՆ առաջատար դերը աշխարհում ժողովրդավարական կարգեր հաստատելու գործում, սակայն նշում է նաև, որ մարդու իրավունքների պահպանման մասին վերջին 2008 թվականի զեկույցը պարունակում է ոչ հստակ ինֆորմացիա և հանգեցնում է հայ-ադրբեջանական խնդրի կողմնակալ մեկնաբանության և հակամարտության խեղաթյուրման:
«Միակողմանի ներկայացումը անտեսում է Լեռնային Ղարաբաղում ապրողների կարծիքն ու ցանկությունը»,- ասվում է նամակում: Մասնավորապես նշվում է, որ պետդեպի զեկույցում օգտագործվում է «էթնիկ հայ անջատողականներ» տերմինը, ինչը ակնհայտ հակահայկական պրոպագանդայի արդյունք է:
ԼՂՀ կառավարությունը ԱՄՆ պետդեպին հաղորդում է նաև, որ ստեղծման օրվանից ԼՂՀ գնում է ժողովրդավարական երկիր ստեղծելու ճանապարհով՝ իր քաղաքացիների ազատությունը և իրավունքները երաշխավորելու համար:
Ամփոփելով՝ ԼՂՀ-ն խնդրում է, որ ԱՄՆ պետդեպարտամենտը հաջորդ անգամ ուշադրություն դարձնի ԼՂՀ մասին զեկույցի լեզվին, քանզի օբյեկտիվ զեկույցը կարող է օգնել ԱՄՆ ջանքերին և հակամարտող կողմերի մեջ փոխվստահություն ստեղծելու հարցում:
