Wikileaks-ում հրապարակված փաստաթղթերից մեկում տեղեկություններ են հաղորդվում Հանրային խորհրդի նախագահ Վազգեն Մանուկյանի և ԱՄՆ դեսպան Մարի Յովանովիչի հանդիպման մասին: Վ.Մանուկյանն ասել է, որ հանրային ուշադրությունը Խորհրդի նկատմամբ աճել է, չնայած Խորհուրդը պետք է հաղթահարի այն թերահավատությունը, որը գոյություն ունի, եթե ցանկանում է ազատվել հասարակական քննարկումը վերահսկելու կառավարության գործիք լինելու համբավից:
Փաստաթղթում նշվում է, որ Հանրային խորհրդի ամենանշանակալի արդյունքներից մեկը եղել է այն, որ առաջարկել է համաներում հայտարարել Մարտի 1-ի գործով ձերբակալվածների նկատմամբ: Սակայն միաժամանակ նշվում է, որ տարածված կարծիք է, թե Սարգսյանը համաներման գնացել է Հանրային խորհրդի կողմից իբր ներկայացված առաջարկի հիման վրա՝ ցույց տալու համար, որ հանրային կարծիքն իր վրա ավելի մեծ նշանակություն ունի, քան ընդդիմությունն ու միջազգային հանրությունը:
Վազգեն Մանուկյանը մեծ խանդավառությամբ է ներկայացրել Հանրային խորհրդի ձևավորման գործընթացը՝ ասելով, որ 900 հ/կ-ների մոտ 1530 պատվիրակներ մասնակցել են խորհրդի ձևավորմանը: Նա հասարակական կազմակերպությունների այս խանդավառությունը բացատրել է կառավարության և ընդդիմության նկատմամբ եղած անվստահությամբ։ «Մեծամասնությունը չի սիրում իշխանություններին, սակայն ԼՏՊ-ն (Լևոն Տեր-Պետրոսյանը) նույնպես այլընտրանք չէ շատերի համար»,- ասել է Վ.Մանուկյանը՝ հավելելով, որ 1995 թվից ի վեր ոչ մի ընտրության արդյունք չի ընդունվել հասարակության կողմից, սակայն շատերը հավատում են Խորհրդին:
Փաստաթղթի մեկնաբանության մեջ ամերիկյան դիվանագետները նշում են, որ Հանրային խորհուրդը փորձ էր այդ մարմնի միջոցով համաներումը կազմակերպելու համար: Եվ չնայած շատերը կարծում են, որ այն կարող է կարևոր դեր խաղալ, սակայն այն ավելի շատ թերահավատություն է առաջ բերում առ այն, որ սա Ռուսաստանից ներմուծված հերթական գործիքն է՝ Հայաստանում ժողովրդավարությունը կառավարելու, այլ ոչ թե երկիրը ղեկավարելու հարցում ժողովրդի դերակատարությունն ավելացնելու համար: