«Երկխոսության առկախումն ամբողջովին տեղավորվում է Կոնգրեսի սկզբունքների մեջ` ինչպես առաջ` մինչև երկխոսությունը, Կոնգրեսն ասում էր, որ քաղբանտարկյալների առկայության պայմաններում երկխոսություն չի կարող սկսվել, այնպես էլ այժմ համարվում է, որ Կոնգրեսի անդամի ձերբակալությունը և այն ապօրինի գործողությունները, որոնք ոստիկանությունում կատարվել են Կոնգրեսի ակտիվիստների և փաստաբանների նկատմամբ, հիմք են երկխոսությունն առկախելու համար»,- «Առաջին լրատվականի» հետ զրույցում գնահատելով ՀԱԿ-ի կողմից երկխոսությունն առկախելու քայլը՝ կարծիք հայտնեց հրապարակախոս Տիգրան Պասկևիչյանը:
Նրա գնահատմամբ` առկախումը որևէ կերպ չի կարող ազդել ՀԱԿ-ի հեղինակության վրա և փոփոխել հանրային կարծիքը: Ըստ Պասկևիչյանի` սթափ դատող մարդը, ով մինչ այսօր հետևել է Կոնգրեսի գործունեությանը և գիտի, թե վերջինս ինչ սկզբունքներով է առաջնորդվում, չի կարող մտածել, որ երկխոսությունն առկախելով Կոնգրեսը հետքայլ է արել:
Հարցին, թե ինչքանով է նպատակահարմար Տիգրան Առաքելյանին ազատ արձակելուց հետո շարունակել երկխոսությունը, Պասկևիչյանը նշեց, որ երկխոսության միջոցով ինչ-որ արդյունքի հասնելու համար տրված բոլոր շանսերը և՛ ՀԱԿ-ը, և՛ իշխանությունները պետք է օգտագործեն: Պասկևիչյանի խոսքերով, ցավալի է, որ իշխանություններն օգտագործեցին օգոստոսի 9-ի միջադեպը երկխոսությունը վիժեցնելու համար, քանզի վերջիններս լավ գիտեին, որ փաստարկներ չունեին արտահերթ ընտրությունների անցկացման անհրաժեշտության վերաբերյալ Կոնգրեսի ներկայացրած հիմնավորումների դեմ:
«Եթե իշխանությունները ազատ արձակեն Տիգրան Առաքելյանին և երեքշաբթի օրը գան կառավարության ընդունելությունների տուն, ապա երկխոսությունը շատ հանգիստ կշարունակվի` որևէ ողբերգական բան տեղի չի ունեցել, որից հետո անհնարին լինի շարունակել երկխոսությունը»,- նշեց Տիգրան Պասկևիչյանը:
