Վրաստանում բնական գազի հանքավայր է հայտնաբերվել, որը շահագործման հանձնելուց հետո, ըստ վրացական մամուլի, վեցից ութ տարի կկարողանա Վրաստանն ապահովել գազով։
Հանքավայրը գտնվում է Թբիլիսիի մոտակայքում։ Վրաստանի նավթի և գազի պետական գործակալության ղեկավար Գիորգի Տատիշվիլին հայտարարել է, որ հորատանցքն այնտեղ հետազոտում է ամերիկյան Schlumberger ընկերությունը, իսկ արտադրության լիցենզիան պատկանում է Block Energy-ին․«Block Energy»-ն մեր խոստումնալից նախագծերից է: Շլումբերգերի հորատած հորատանցքում, այդ տարածքում հաստատվել են 16 մլրդ խմ պաշարներ։ Եթե պատկերացնում եք, սա հավասար է մոտ ութ տարվա ընթացքում Վրաստանի սպառմանը»,- ասել է Տատիշվիլին։
Հայաստանում այս տեղեկությունը բավականին ակտիվ կերպով քննարկվում է մամուլում և սոցիալական ցանցերում։ Կա նույնիսկ տեսակետ, թե Վրաստանը կկարողանա առաջիկա տարիներին սրա շնորհիվ էներգետիկ անկախություն ձեռք բերել մյուս հարևաններից, ինչի շնորհիվ Թբիլիսիի հետ տնտեսական հարաբերություններ կառուցելը մեզ համար ավելի հեշտ կլինի։
Վրացահայ քաղաքական մեկնաբան, «Բազմազգ Վրաստան» նախաձեռնության ղեկավար Առնոլդ Ստեփանյանն «Առաջին լրատվական»-ի հետ զրույցում նշեց, որ նման խանդավառությունն այնքան էլ տեղին չէ։ Ստեփանյանը փոխանցեց, որ ուսումնասիրությունների համաձայն՝ Վրաստանին մինչև 6 տարի կարող է բավարարել հայտնաբերված գազի պաշարները․ «Հասկանում եք, որ այդ ժամկետը բավականին փոքր է, որ այդ ընթացքում ուրիշների հետ բացարձակապես չաշխատես։ Բացի այդ՝ հայտարարված չէ դեռ գինն ինչքան է լինելու, դա իհրակե կախված է մի շարք գործոններից։ Բնականաբար շատ լավ է, որ գազի հանքավայր է հայտնաբերվել, բայց դա բոլորվին չի նշանակում, որ Վրաստանը կարող է 6 տարի նստել ու ոչ մեկից գազ չառնել»։
Ստեփանյանի դիտարկմամբ՝ բնականաբար սրանով չի վերանա նաև Վրաստանի կախվածությունն իր մյուս հարևաններից․ «Պաշարները շատ չեն, չենք կարող խոսել անկախության մասին։ Ադրբեջանի հետ համեմատած՝ սա ծովի մեջ մի կաթիլ է»։
Ի տարբերություն Հայաստանում առկա քննարկումների, Վրաստանում այս լուրն այնքան էլ մեծ ակտիվություն չի առաջացրել․ «Անկեղծ ասած՝ Վրաստանում հիմա այնքան շատ քննարկվող թեմաներ կան,որ այդ մեկը հաստատ թոփերի մեջ չէ։ Մանավանդ կա հստակ պատկերացում, որ 6 տարին ոչինչ է։ Հիմա միայն գտել են, մինչև մնացած գործընթացներն ավարտվեն, խողովակներ անցկացվեն, երկար ժամանակ կպահանջվի։ Իհարկե լավ է, որ Հայաստանում կան դրական քննարկումներ, բայց սրանք այն պաշարները չեն, որ Վրաստանին էներգոռեսուրսների առումով կարող են անկախություն ապահովել»։
Ըստ մեր զրուցակցի՝ սրանով հայ-վրացական տնտեսական համագործակցության մեջ էլ ոչինչ չի փոխվի․ «Ընդամենը մի քանի տարվա համար է։ Ես կարծում եմ, որ հիմա որևէ բան դրա հետ չի արվի, կպահեստավորվի և որպես ռազմավարական պահուստ կպահվի։ Ամենայն հավանականությամբ տրամաբանական է, որ այդպես արվի։ Գուցե արտակարգ իրավիճակների դեպքում օգտագործվի, չեմ կարծում, թե հիմա նման բան արվի»,-եզրափակեց մեր զրուցակիցը։
