Մեծ Բրիտանիայի պաշտպանության նախարար Բեն Ուոլեսը, որը երկրի հաջորդ վարչապետի գլխավոր հավակնորդներից մեկն էր համարվում, հայտարարել է, որ չի առաջադրելու իր թեկնածությունը վարչապետի պաշտոնում Բորիս Ջոնսոնի հրաժարականից հետո: Այդ մասին Ուոլեսը հայտարարել է Թվիթերի իր պաշտոնական էջում՝ շեշտելով, որ ուզում է կենտրոնանալ Մեծ Բրիտանիան անվտանգ պահելու գործի վրա:
«Գործընկերներիս և ընտանիքիս հետ մանրակրկիտ քննարկումից հետո ես որոշում եմ կայացրել չմիանալ Պահպանողական կուսակցության ղեկավարի պաշտոնի համար մրցապայքարին: Շատ շնորհակալ եմ իմ խորհրդարանական և այլ գործընկերներից, ովքեր խոստացել էին աջակցել ինձ: Հեշտ չէր նման որոշում կայացնելը, բայց ես ուզում եմ կենտրոնանալ իմ ներկայիս աշխատանքի և այս մեծ երկիրը անվտանգ պահելու վրա», – գրել է Բեն Ուոլեսը:
Մեծ Բրիտանիայի նոր վարչապետի հավանական թեկնածուներից են արտգործնախարար Լիզ Թրասը, պետնախարար Փեննի Մորդոնտը, բնակարանային և կոմունալ տնտեսության, համայնքների և տեղական ինքնակառավարման նախարար Մայքլ Գովը, ֆինանսների նախկին նախարար Ռիշի Սունակը և պահպանողական այլ գործիչներ, ովքեր կպայքարեն Պահպանողական կուսակցության նոր ղեկավարի և որպես հետևանք՝ նաև երկրի վարչապետի պաշտոնի համար: Քանի որ Մեծ Բրիտանիայի և Հյուսիսային Իռլանդիայի Միացյալ Թագավորությունը խորհրդարանական կառավարման մոդելի երկիր է, իսկ խորհրդարանի ստորին՝ Համայնքների պալատում 2019 թ. ընտրությունների արդյունքներով մեծամասնություն է կազմել Պահպանողականների կուսակցությունը, այդ պատճառով հաջորդ վարչապետն ընտրվելու է պահպանողականների թեկնածուներից:
Հուլիսի 7-ին Բորիս Ջոնսոնը հայտարարել էր Մեծ Բրիտանիայի վարչապետի և Պահպանողական կուսակցության առաջնորդի պաշտոններից հրաժարվելու որոշման մասին: