Այսօր առավոտյան 10:50-ի սահմաններում Լոռու մարզի Լերմոնտովո գյուղի ճանապարհին շրջվել է 15 տոննայից ավել ժավելի սպիրտ տեղափոխող Iveko մակնիշի 40 A 42910 պետհամարանիշի բեռնատար ավտոմեքենան:
ժամը 11:08-ին ահազանգ է ստացվել, որ Լերմոնտովո գյուղի ճանապարհին շրջվել է բենզին տեղափոխող մեքենա, սակայն փրկարարները ժամանել են և տեսել, որ մեքենան բեռնված է եղել ժավելի սպիրտով:
Փրկարարներին հաջողվել է մեքենայից դուրս բերել վարորդին, ում այժմ տեղափոխում են Երևան: Վարորդի վիճակը ծանր է:
Ամբողջ 15 տոննայից ավելի ժավելի սպիրտը թափվել է փողոց, սակայն Վանաձորից ժամանած փրկարարական խմբի ղեկավար Անտոնյանը «Առաջին լրատվականի»ի հետ զրույցում հավաստիացրեց, որ բոլոր անհրաժեշտ միջոցները ձեռնարկված են, և մարդկանց առողջությանը սպառնացող վտանգ չկա:
Նշենք, որ բեռնատարը ժավելի սպիրտը «Մհեր» ՍՊԸ պատվերով պետք է տեղափոխեր Թավրիզից Վանաձոր:
