WikiLeaks-յան վերջին բացահայտումներից մեկն առնչվում է «Իրան-Հայաստան» գազատարի կառուցման հիմնախնդրին։ Հայաստանում ԱՄՆ դեսպանատնից Վաշինգտոն ուղարկված հաղորդագրությունը թվագրված է 2004 թվականի փետրվարի 24-ով։
Դրանում նշված է. «Հայ պաշտոնատար անձինք դարձյալ հանդես են եկել «Իրան-Հայաստան» գազատարի կառուցման առաջարկով, ինչը միտված է Հայաստանի էներգետիկ դիվերսիֆիկացման (բազմատեսակության) հետ կապված մտահոգությունների մեղմացմանը։
Փետրվարի 10-ի իր ելույթում Հայաստանի էներգետիկայի նախարարը հայտարարեց, որ ինչ-որ պահի Հայաստանը կարող է համաձայնության գալ Իրանի նավթի ու գազի նախարարի հետ՝ այսուհետ երկու տարվա ընթացքում մեկ միլիարդ խորանարդ մետր բնական գազի գնման շուրջ։ Սակայն հայ նախարարը չի նշել դրա հետ կապված մյուս դետալները՝ գնվելիք գազի գինն ու գազատարի տարեկան թողունակությունը։
Հայաստանը վաղուց ի վեր Իրանը դիտարկել է որպես պոտենցիալ գազամատակարար երկիր՝ հաշվի առնելով ատոմակայանի անխուսափելի փակման հարցը։ Հայաստանի գազային պահանջարկը շատ մեծ է, ինչի համար էլ արդարացված կլինեն գազատարի կառուցման մեծ ծախսերը։
Դրանով կնվազի Վրաստանի միջոցով Հայաստան ներկրվող ռուսական գազից ունեցած մեծ կախվածությունը, ռուսական գազի գների բարձրացման դեպքում իրանական գազը կարող է մրցունակ (էժան) լինել։
Պլանավորված է, որ Իրանի նավթի ու գազի նախարարն այցելելու է Հայաստան՝ քննարկելու գազային համաձայնագրի կնքման հարցը։ Որոշված չէ իրանական գազի գնի հարցը, բաց է մնում նախագծի ֆինանսավորման հարցը։ Խողովակաշարի կառուցումը գնահատվում է 120 միլիոն դոլար։
Մեծամորի ատոմակայանի վերաբերյալ ԵՄ-Հայաստան քննարկումների ժամանակ հնարավոր է համարվել իրանական գազատարի երկարաձգումը մինչև Վրաստան։ Այն կունենա 550 կիլոմետր երկարություն և տարեկան 4.5 միլիարդ խորանարդ մետր թողունակություն։ Բացի այդ, չի բացառվել, որ իրանական գազատարը Երևանից կարող է շարունակվել նաև դեպի Արևելյան Թուրքիա։ Այս պլանները պահանջում են տարբեր խողովակաշարեր՝ տարբեր տրամագծերով ու տարբեր ֆինանսական պայմաններով»:
