Հուլիսի 3-ին Թբիլիսիի Ռուսթավելի պողոտայի վրա տեղի է ունեցել «Դեպի տուն՝ Եվրոպա» կոչվող բողոքի երրորդ ակցիան։ Ցուցարարների հիմնական պահանջը վարչապետ Իրակլի Ղարիբաշվիլիի հրաժարականն է և ազգային համաձայնության կառավարության ձևավորումը, որը կապահովի Եվրահանձնաժողովի տասներկու պայմանների կատարումը, որպեսզի Վրաստանը ստանա ԵՄ անդամի թեկնածուի կարգավիճակ։
Այս ակցիայի մասին քաղաքացիական ակտիվիստները հայտարարել էին հունիսի 24-ին՝ նույն վայրում անցկացված նախորդ հանրահավաքում։ Այնուհետ ցուցարարները յոթ օր ժամանակ էին տվել իշխանություններին՝ իրենց պայմանները կատարելու համար։
Հուլիսի 3-ի առավոտյան «Ամոթ» (Shame) երիտասարդական շարժումը զգուշացրել է, որ ակտիվիստները ողջ գիշեր մնալու են դրսում։ Առայժմ դա կլինի մեկ անգամ, բայց բողոքն ավելի ինտենսիվ է դառնալու՝ պահպանելով խաղաղ և ոչ բռնի ձևը։ Կեսօրին Վրաստանի 20 քաղաքներից Թբիլիսի են մեկնել անվճար ավտոբուսներ՝ ռեգիոններից մասնակիցներ տանելու համար։ Տրանսպորտը տրամադրել է ընդդիմադիր «Lelo» կուսակցությունը։
Հիշեցնենք, որ Եվրամիության ղեկավարները հունիսի 23-ին ԵՄ գագաթնաժողովում Ուկրաինային և Մոլդովային թեկնածուի կարգավիճակ տրամադրեցին։ Նրանք ընդունեցին Վրաստանի եվրոպական հեռանկարը և պատրաստակամություն հայտնեցին՝ մի շարք պայմանների կատարման դեպքում նրան թեկնածուի կարգավիճակ տալ։
