«Քաղաքացիական պայմանագիր» կուսակցությունը վերջերս որոշում կայացրեց առաջիկա ՏԻՄ ընտրություններում կուսակցության համամասնական ցուցակների մասով, ըստ այդմ՝ Ալագյազում՝ Անզոր Ուռուսյանը, Ալավերդիում՝ Արեն Մկրտչյանը, Ակունքում՝ Հունան Ռուբենյանը, Արենիում՝ Հուսիկ Սահակյանը, Բերդում՝ Վահրամ Սուքիասյանը, Բյուրեղավանում՝ Վլադիմիր Վարդևանյանը, Գյուլագարակում՝ Խաչիկ Վարդանյանը, Եղեգիսում՝ Արթուր Ստեփանյանը, Թալինում՝ Տավրոս Սափեյանը, Լոռի Բերդում՝ Արայիկ Ներսիսյանը, Ծաղկահովիտում՝ Նորաին Հակոբյանը, Չարենցավանում՝ Արթուր Գալստյանը, Ջրվեժում՝ Ռոբերտ Պետրոսյանը, Սիսիանում՝ Արմեն Հակոբջանյանը, Տաշիրում՝ Արման Վարդանյանը, Քաջարանում՝ Արմեն Առաքելյանը։
Իրազեկ քաղաքացիների միավորում ՀԿ համակարգող Դանիել Իոաննիսյանը «Առաջին լրատվական»-ի հետ զրույցում նշեց, որ ՏԻՄ ընտրակարգը և ԸՕ-ն փոխվել են, և այս առումով խնդիրների «առյուծի բաժինը» անցյալում է, սակայն ՔՊ-ն որոշ խնդիրների կարծես թե ուզում է վերադառնալ։
«Մասնավորապես այն, որ համայնքի ղեկավարի ընտրությունը դարձնում են փակ քվեարկությամբ, դա լուրջ խնդիր է, դա եղել է նաև ՀՀԿ-ի ժամանակ։ Եվ այդ հանգամանքն օգտագործելով՝ ՀՀԿ-ն չունենալով մեծամասնություն ավագանիում, 2016-ին կարողացավ մարդկանց ճնշել, ազդել նրանց վրա և իրենց թեկնածուին անցկացնել։ Սա անցյալ տարվա ԸՕ փոփոխություններով փոխվեց, դարձավ բաց քվեարկություն, որպեսզի բոլորը տեսնեն՝ ով ինչպես է քվեարկում համայնքի ղեկավարին, բայց հիմա Վահագն Հովակիմյանի նախագծով ուզում են վերդառնալ փակ քվեարկության»,-ասաց Իոաննիսյանը։
Եվ սա, նրա խոսքով, նշանակում է, որ իրենք այն, ինչ փորձեցին, բայց չկարողացան անել Վարդենիսում և Մեղրիում վերջին ՏԻՄ ընտրությունների ժամանակ, երբ ընդդիմադիրները հաղթեցին, հիմա ՔՊ-ն կփորձի համոզել կամ առևտուր անել հետները․ «Մարդիկ չէին համաձայնվում այդ առևտրին, որովհետև բաց քվեարկություն էր, ոչ ոք չէր համաձայնվում, քանի որ բոլորը տեսնում էին՝ ով է ծախվել, հիմա ՔՊ-ն ուզում է այդ ընտրությունը գաղտնի դարձնել, որ մարդիկ չտեսնենք՝ ովքեր են ծախվել ընտրություններից հետո ծախվելու դեպքում։ Սա քաղաքական առևտի հնարավորություն բացող փոփոխություն է»։
Ինչ վերաբերում է ՔՊ-ի համամասնական ցուցակները գլխավորողներին, Իոաննիսյանը զերծ մնաց գնահատական տալ, քանի որ դիտորդություն են իրականացնելու և կոռեկտ չի լինի անձնանց մասին մեկնաբանություն անելը։
Նա նշեց՝ ընտրությունների հետ կապված թափանցիկությունը կապված կլինի օրենսդրության հետ, թե ինչ ԸՕ-ով կարվի, արդյոք Վահագն Հովակիմյանի առաջարկած նախագիծը կյանքի՞ կոչվի։ Նա նշեց, որ այդ նախագծում կան դրույթներ, որոնք կարևոր են և պետք են, բայց կոնկրետ այդ փոփոխությունն անթույլատրելի է։
Նրա խոսքով՝ շատ կարևոր է, որ ՏԻՄ-ի խոշորացումը չվերածվի ՏԻՄ-երում արտահերթ ընտրություններ անելու մեխանիզմի։
ՏԻՄ վերջին ընտրությունները, Իոաննիսյանի դիտարկմամբ, ցույց տվեցին, որ կան օրենսդրական բացեր, բայց հիմնական խնդիրներն իրապես իմպլեմենտացիոն են և ոչ թե օրենսդրական․
«Օրենսդրությունն արդեն բավականին լավն է, ես չեմ ասի իդեալական է, այնպես է, ինչպես մենք ուզում ենք, բայց բավականին լավ օրենսդրություն է, և ինձ թվում է, որ ԸՕ-ում այլևս չկան լրջագույն խնդիրներ։ Խնդիրներ կան հարակից օրենսդրության մեջ, օրինակ՝ կուսացկությունների հետ կապված, կան իմպլեմենտացիոն խնդիրներ և այլն»,-հավելեց նա։
