News Georgia-ի փոխանցմամբ՝ այս տարի Վրաստանում նորածինների համար ամենահանրաճանաչ անունները դարձել են «Մարիամ»-ն ու «Նիկոլոզ»-ը։ Այս մասին հայտարարել է Արդարադատության նախարարության քաղաքացիական գրանցման գործակալությունը։
Վերջինիս հաղորդմամբ՝ այս տարի «Նիկոլոզ» անունը գերազանցել է Վրաստանում արական սեռի ներկայացուցիչների համար ամենատարածված «Գեորգի» անվանը։ 2011 թվականին «Նիկոլոզ» անունը շնորհվել է 2143 նորածնի։ Արական սեռի անունների լավագույն հնգյակում են ընդգրկվել նաև «Գեորգին» (2013), «Լուկա»-ն (1306), «Սաբա»-ն (1173) ու Դավիթը (984)։
Իգական սեռի անունների թվում գերիշխում է «Մարիամ»-ը՝ 2525 նորածին, որը գերազանցել է Վրաստանում առավել հանրաճանաչ «Նինո» անվանը։ Վերջինս այս տարի հայտնվել է երկրորդ տեղում (1522), ապա գալիս են «Աննա»-ն (1339), «Էլենե»-ն (1038), «Անաստասիա»-ն (1009)։
Չնայած վերոնշյալին՝ «Գեորգի» անունը շարունակում է Վրաստանում մնալ առաջատար, ապա գալիս են «Դավիթ»-ը, «Զուրաբ»-ը, «Ալեքսանդր»-ը, «Լևան»-ը, «Թեյմուրազ»-ը և այլն։
Կանացի անունների թվում գերիշխում է «Նինո»-ն, ապա գալիս են «Թամար»-ը, «Մարինա»-ն, «Մարիա»-ն, «Լիա»-ն և այլն։
