WikiLeaks-ի հրապարակումների հերթական խմբաքանակը, որը վերաբերում էր Հայաստանին, բովանդակային բավական հետաքրքրական կառուցվածք ուներ՝ ներառելով թե՛ արտաքին քաղաքական, թե՛ ներքին քաղաքական, թե՛ տնտեսական ուղղություններ: Հիշատակվում էին թե՛ ընդդիմությունն ու առաջին նախագահ Տեր-Պետրոսյանը, թե՛ Ռոբերտ Քոչարյանն ու նրա արտգործնախարար Վարդան Օսկանյանը, ով, ի դեպ, սեպտեմբերից պատրաստվում է տեղեկատվական ակտիվություն ցուցաբերել, թե՛ Հայաստանում կոնյակի արտադրության ոլորտը, ինչը ոչ միայն տնտեսության կարևորագույն ճյուղերից է, այլ նաև հայաստանյան եզակի բրենդ աշխարհում: Ի դեպ, այդ առումով հիշատակումը բավական բացասական է և փաստացի հարված այդ հայկական բրենդին, ինչն, իհարկե, մտահոգության և մտորելու տեղիք է տալիս:
Ի՞նչն էր ընդհանուր առմամբ WikiLeaks-ի այդ ընդգրկունության պատճառը, «խաղացող» սուբյեկտների այդպիսի լայն հիշատակումը, ոլորտային այդպիսի բազմազանությունը: Ըստ ամենայնի, դա արտացոլանքն էր Հայաստանի ներկայիս քաղաքական, կամ տնտեսաքաղաքական իրավիճակի հանդեպ արևմտյան, ավելի կոնկրետ` ամերիկյան վերաբերմունքի: Հայաստանի տնտեսաքաղաքական կյանքը, չնայած առերևույթ գործընթացներին, խորքային իմաստով թերևս հայտնվել է վերջին երեք տարիների համար կարծես թե աննախադեպ տեղապտույտի մեջ, երբ առջևում կարևորագույն քաղաքական փուլ է` խորհրդարանի և նախագահի ընտրություն: Մինչդեռ քաղաքական ընդհանուր դաշտն աչքի է ընկնում առավել շատ իներտությամբ, քան այդ փուլից առաջ նախանշվող նախաձեռնողականությամբ:
Հայաստանում քաղաքական խաղը առաջ մղելու անհրաժեշտություն է զգացվում, և, ըստ ամենայնի, WikiLeaks-ի հերթական բացահայտումների գլխավոր շարժառիթն էլ հենց այդ է, և թերևս ընտրվել է բազմազան դիապազոն, որպեսզի խաղի շարժվելու հավանականությունն առավել մեծ լինի: Ներկայումս բավական հետաքրքրական կլինի սպասել հայաստանյան խաղացողների արձագանքներին` թե՛ ընդդիմության, թե՛ երկրորդ նախագահ Քոչարյանի, թե՛ նաև իշխանության, որի ուղղակի հիշատակումներ կարծես թե այս անգամ չկան, բայց որն ինքնին մի սուբյեկտ է, որը ուղղակի թե անուղղակի գոյություն է ունենալու այս կամ այն զարգացման սցենարում, ցանկացած խաղի մեջ:
Ինչպիսի՞ վարքագիծ են ցուցաբերելու ներքին կյանքի այդ սուբյեկտները, ինչպե՞ս են նրանք արձագանքելու այս անգամվա WikiLeaks-ին, ի՞նչ խոսքով և ի՞նչ գործով: Այդ տեսանկյունից, սեպտեմբերին իսկապես հետաքրքիր իրադարձություններ են սպասվում: Իհարկե, հաստատ ոչ վճռական, բայց զգալիորեն հետաքրքիր:
