ՄԱՀՀԻ ղեկավար Ստյոպա Սաֆարյանը ֆեյսբուքյան իր էջում գրել է. Դեռևս միայն հասցրել եմ ԱԺ-ում Փաշինյանի ելույթից լսել Մեղրիի փոխանակության տարբերակի հատվածը։ Սկզբից թվաց, թե քաղաքական պայքարի տրամաբանությամբ նա փորձում է մի փոքր ավելին բարդել Քոչարյանի վրա, քան կա. ի նկատի ունեմ այն պահը, երբ սկսեց ներկայացնել, թե Հայաստանի անունից բանակցողը համաձայնել է Մեղրի միջանցքը փոխանակել Լաչինի միջանցքի հետ։ Եթե ասվեր միայն այդքանը, ու մի կողմ թողնվեր Հայաստանի տարածքը սակարկության առարկա դարձնելու ողբերգությունը, ապա նույնիսկ այդպիսի ձևակերպմամբ դեռ չէր նշանակի, թե Հայաստանը ճանաչել է Արցախը Ադրբեջանին։
Այդ ձևակերպումը կնշանակեր, որ Արցախը վիճելի է’ Ադրբեջանինը չէ և ուղղակի լուծվում է Հայաստանի հետ նրա, և Ադրբեջանի հետ Նախիջեւանի տարածքային կապի հարցը սիմետրիկ միջանցքային տրամաբանությամբ։ Բայց Փաշինյանը շարունակում է այն, որ ըստ էության տարածքային վեճի (ոչ միջանցքների փոխանակություն) շրջանակներում Ադրբեջանը Հայաստանին է տալիս “ԻՐ” Ղարաբաղ/Շուշին ու Լաչինը, իսկ Հայաստանը Ադրբեջանին’ իր Մեղրին… Փաշինյանը պնդում է, թե կարգավորման այս տարբերակի տրամաբանությունը հենվում է դրա վրա’ երկու երկրները միմյանց հետ փոխանակություն են կատարում իրենց սուվերեն տարածքների հաշվին’ տարածքային վեճը լուծելու համար… Եթե կարգավորման այդ տարբերակի տրամաբանությունն իսկապես այնպես է, ինչպես Փաշինյանն է ներկայացրել, ապա դա աղետ է… Դա նշանակում է, որ հենց Ադրբեջանի կողմից դրա մերժումից հետո Բաքվին չոր մնացորդ մնացել է այն, որ Հայաստանը շատ ավելի հստակ է ճանաչել Արցախի ադրբեջանապատկանությունը, և Սյունիքի միջանցքի լեգիտիմացումը… Երկու ծուղակ, որոնք մինչեւ այժմ մեզ հետապնդում են, որ որից չենք կարողանում դուրս գալ…
Ես չեմ բավարարվելու Փաշինյանի պատմածով ու կրկին պահանջելու եմ գաղտնազերծել կարգավորման բոլոր տարբերակները։ Ռոբերտ Քոչարյանն ինքն էլ պարտավոր է իր արդարացիության ապացուցման համար հրապարակել այն, այլապես այն, ինչի տակ նա մնում է Փաշինյանի պատմածով, դրա տակից անմեղ դուրս գալ պարզապես բացառված է…
Պարոնայք, հրապարակեք ամբողջը. ձեր վերաշարադրանքները բավարար չեն։ Դատավորը ժողովուրդն է…
