Abkhazeti.info-ի փոխանցմամբ՝ այսօր Աբխազիայում տեղի են ունենում վաղաժամ նախագահական ընտրություններ։ Դրանք մեկնարկել են ժամը 08.00-ին և ավարտվելու են 20.00-ին։ 35 ընտրական օկրուգներում ստեղծվել է 172 ընտրատեղամաս։ Աբխազիայի Կենտրոնական ընտրական հանձնաժողովի (ԿԸՀ) տվյալներով՝ ընտրություններին կարող է մասնակցել 143,735 մարդ։
Աբխազիայի նախագահական աթոռին հավակնում է երեք թեկնածու՝ Ալեքսանդր Անկվաբը, Սերգեյ Շամբան և Ռաուլ Խաջիմբան։ Ընտրության նախնական արդյունքները ԿԸՀ-ն կհրապարակի վաղը։ Եթե ընտրություններին մասնակցի ընտրական իրավունք ունեցողների կեսից էլ քիչ մարդ, ապա ընտրությունները կհամարվեն չկայացած։
Աբխազիայի Սահմանադրության համաձայն՝ ընտրությունների ժամանակ ընտրված է համարվում այն թեկնածուն, ով հավաքել է ընտրություններին մասնակցածների 50 % +1 քվեն։
Նախագահական թեկնածուներից Անկվաբը 2005-2010 թվականներին եղել է Աբխազիայի վարչապետ, իսկ 2010 թվականից ցայժմ Աբխազիայի փոխնախագահն է։
Ռաուլ Խաջիմբան իր հերթին 2003-2004 թվականներին է եղել Աբխազիայի վարչապետ, իսկ 2005-2009 թվականներին՝ Աբխազիայի փոխնախագահ։
Սերգեյ Շամբան 1997-2010 թվականներին վարել է Աբխազիայի արտգործնախարարի, իսկ 2010 թվականի փետրվարից ցայժմ՝ Աբխազիայի վարչապետի պաշտոնները։
Հիշեցնենք, որ Աբխազիայի նախկին նախագահ Սերգեյ Բագափշն աջ թոքի վիրահատությունից հետո մահացել է մայիսի 29-ին՝ Մոսկվայում, ինչի համար շատերը մեղադրում են Կրեմլին։
Ի դեպ, վերջերս Կովկասի հարցերով վրացի փորձագետ Մամուկա Արեշիձեն հայտարարել է, որ Ռուսաստանը մինչև վերջ չի վստահում Սերգեյ Շամբային, և որ իր գնահատմամբ՝ Կրեմլի համար առավել հարմար է նախագահի պարտականությունների ժամանակավոր պաշտոնակատար Ալեքսանդր Անկվաբի թեկնածությունը.
«Կրեմլի համար առավել հարմար է Անկվաբի թեկնածությունը, որը առավել հայտնի է և ունի ավելի մեծ կշիռ։ Խաջիմբան իր հերթին հանդիսացել է անվտանգության ծառայության աշխատակից և միաժամանակ Վրաստանի ՆԳՆ-ի շտաբի պետը, նա համարվում է Շևարդնաձեի կադրը։
Ինչ վերաբերում է Շամբային, ապա թեև նա ճկուն քաղաքական գործիչ է, այնուամենայնիվ, Կրեմլը մինչև վերջ չի վստահում նրան։ Շամբան բարյացակամ է տրամադրված Մոսկվայի նկատմամբ, սակայն Մոսկվայում կարծում են, որ Շամբան առավել հակված է դեպի Արևմուտք»։